افغانستان او پاکستان یوې زورورې زلزلې لړزولي
۱۳۹۸ آذر ۲۹, جمعه
د جمعې په ورځ (د ۲۰۱۹م کال د دسمبر میاشتې په ۲۰مه نیټه) د امریکا متحده ایالاتو د ځمکې پیژندنې ادارې ویلي دي چې د جمعې په ورځ (د ۲۰۱۹م کال د دسمبر ۲۰مه) تر غرمې وروسته د افغانستان او پاکستان ګڼ شمیر سیمې زلزلې لړزولي چې شدت یې د ریشتر په مقیاس ۶،۱ درجه وو.
د متحده ایالاتو د ځمکې پیژندنې ادارې ویلي دي چې د زلزلې مرکز د افغانستان په شمال کې د جرم ته څیرمه سیمه ده. د یادې ادارې په حواله، د زلزلې ژوروالی شاوخوا ۲۰۰ کیلومترو ته رسیږي.
په ورته وخت کې، د افغانستان او پاکستان په پلازمینو کې هم خلکو د زلزلې دوه ټکانونه حس کړي دي خو تر اوسه پورې د مالي او ځاني زیان په هکله رپوټونه لا نه دي ورکړل شوي. زیاته شوې چې د زلزلې ټکانونه ان د هندوستان په نوي ډهلي کې هم خلکو احساس کړي دي. د پاکستان په لاهور کې هم ویریدلي خلک کوڅو ته راوتلي ول.
د زلزلې مرکز د افغانستان په شمال کې د بدخشان په ولایت کې یوه سیمه ښودل شوې ده. د امریکا د ځمکې پیژندنې اداره اټکل کوي چې د یادې زلزلې له کبله ښايي ډیر مالي زیانونه پیښ نه شي خو بیا هم د تلفاتو او مالي زیانونو احتمال نه ردوي.