امریکا او اروپایي اتحادیې په اختر کې د اوربند هرکلی کړی
۱۳۹۹ مرداد ۸, چهارشنبه
طالبانو د سه شنبې په ورځ د لوی اختر په مناسبت د یوې اعلامیې د خپرولو په ترڅ کې له خپلو جنګیالو غوښتي چې د اختر په درو ورځو کې هیڅ راز بریدونه و نه کړي. تر دې اعلان وروسته د افغانستان د جمهور رئیس ویاند صدیق صدیقي، د ټویټر په یوه پیغام کې ولیکل چې جمهور رئیس ټولو امنیتي ځواکونو ته امر کړی چې درې ورځنی اوربند رعایت شي.
د فرانسې خبري آژانس په خپل رپوټ کې لیکلي دي چې د طالبانو له لوري دغه اعلان وروسته له هغې کیږي چې د افغانستان جمهور رئیس د بندیانو د تبادلې د دوام په برخه کې د پرمختګ زیګنال ورکړ. د بندیانو د تبادلې په هکله ناندرۍ د سولې خبرې اترې ځنډنۍ کړي دي.
د افغانستان د سولې له پاره د امریکا متحده ایالاتو ځانګړي استازي زلمې خلیلزاد د اوربند د وړاندیز هرکلی کړی دی. زلمي خلیلزاد د خپل ټویټر په پیغام کې لیکلي دي: «موږ په اختر کې د طالبانو د اوربند او د افغان حکومت له لوري د متقابل اعلان هرکلی کوو.»
په کابل کې د متحده ایالاتو سفیر راس ویلسن هم هیله څرګنده کړې ده چې دواړه لوري ژر د خبرو اترو میز ته کیني.
هغه د خپل ټویټر په پیغام کې لیکلي دي چې افغانان د دې مستحق دي چې اختر «په سوله کې ولمانځي.»
طالبانو د اوربند اعلان وروسته له هغې وکړ چې جمهور رئیس محمد اشرف غني وویل چې حکومت په راروانه اوونۍ کې د سولې خبرو اترو ته چمتو دی.
په افغانستان کې د اروپایي اتحادیې استازولۍ هم د ټویټر په یوه پیغام کې د اوربند هرکلی کړی دی. د دغه استازولۍ د ټویټر په پیغام کې راغلي دي چې په اختر کې د متقابل اوربند اعلان نه یوازې «د تاوتریخوالي د راکمیدو، بلکې په اغیزمنه توګه د سولې د مذاکراتو د پیلیدو له پاره هم یو فرصت دی.»