د افغانستان او سویلي افریقا لوبه؛ کومه لوبډله به یې وګټي؟
۱۴۰۳ شهریور ۳۰, جمعه
د افغانستان د کریکټ ملي لوبډله نن په شارجه کې له سویلي افریقا سره د یو ورځینیو لوبو په لړۍ کې دوېمه لوبه کوي. دغه پنځوس اوریزه لوبه د افغانستان پر وخت د مازیګر پر څلور نیمو بجو پیلېږي.
افغان کریکټ بورډ پر خپلو ټولنیزو پاڼو لیکلي چې «افغان لوبډله خپلې دوېمې او نننۍ لوبې ته بشپړ چمتووالی لري.»
د یو ورځنیو لوبو په لوبلړۍ کې د دواړو لوبډلو لومړۍ لوبه هم شارجه کې د تېرې چهارشنبې پر ورځ شوې وه، چې افغان لوبډلې پکې د سویلي افریقآ لوبډلې ته په شپږو ویکټو ماتې ورکړه او دا په نړیوال کریکټ کې د سویلي افریقا خلاف د افغان لوبډلې لومړۍ بریا وه.
اړوند: د کریکټ نړیوال جام کې د افغان لوبډلې سفر؛ لاسته راوړنې او نیمګړتیاوې
که چېرې افغانستان نننۍ لوبه هم وګټي، نو د دریو یو ورځنیو لوبو دا لړۍ به هم په خپل نوم کړي.
د سویلي افریقا کریکټ بورډ د پنجشنبې پر ورځ یوې خبرپاڼې کې افغانستانسره د دوه اړخیز کریکټ د دوام خبر ورکړی دی؛ خو په دې اړه ډېر جزئیات نه دي ورکړل شوي او نه هم د افغانستان کریکټ بورډ له سویلي افریقا سره د نورو لوبلړیو په اړه معلومات خپاره کړي دي.