د ایران انتخابات؛ تهران کې محافظه پال کاندیدان مخکې دي
۱۴۰۲ اسفند ۱۲, شنبه
د آلمان خبري آژانس د رپوټ پر اساس، د ایران دولتي راډیو د شنبې په ورځ وويل چې د حامد رسايي په مشرۍ یو سخت دريځ اتحاد د تهران له ۳۰ څوکيو څخه ۱۷ ګټلي دي.
د ایران د پارلمان د اوسنی مشر، محمد باقر قالیباف، چې د ېوې بلې محافظه پاله ډلې مشري کوي، هم یو نوی منديټ په لاس راوړی دی.
د مهر خبري آژانس د رپوټ مطابق د جمعې ورځې انتخابات د خلکو د مشارکت له اړخه ډېر ضعیف وو. رپوټ وايي رایو د ورکړې په شرایطو برابر ۴۱ سلنه کسان د رای اچونې مرکزونه ته ولاړل چې تهران ېې ۲۴ سلنه برخه تشکيلوي. خو د آلمان خبري آژانس وايي چې دغه ارقام په خپلواک توګه تائيدولی نشي.
ایران د جمعې په ورځ له خپل شاوخوا ۶۱ میلیونه نفوس څخه غږ وغوښتل چې په انتخاباتو کې ګډون سره خپل نوی پارلمان او د خبرګانو مجلس چې په سیستم کې د اسلامي روحانیونو یوه اغیزناکه بدنه ده، وټاکي.
په ایران کې نوماندان د ګوندونو له خوا انتخاباتي سیالیو ته نه وردانګې بلکې خپله نوماندي په لیستونو کې تنظیموي.
د بېلګې په توګه په تهران کې د پارلماني انتخاباتو له پاره ۳۰ څوکۍ په نظر کې نيول شوي چې هر اتحاد ورته ۳۰ نوماندان وړاندې کړي دي.
د ایران پارلمان ټول ټال ۲۹۰ څوکۍ لري چې په هرو څلورو کلونو کې ېې انتخابات ترسره کيږي. په انتخاباتو کې د نګهبان شورا چې یو نظارت کونکی بنسټ دی د سیاستوالو د ايديالوژيکي شايستګۍ په برخه کې تصمیم نیسي.
په نهایت کې د نوماندانو په لیست کې سیستم ته وفادار عناصر وي او ایرانیان یوازې د همدوی له ډلې خپل د خوښې نوماند ټاکلی شي.
د آلمان خبري آژانس په پای کې زیاتوی چې د سیستم ډېری منتقد نوماندان له انتخاباتو څخه د مخه د نګهبان شورا له خوا حذف کیږي. د ایران سیاسي سیستم د ۱۹۷۹ کال انقلاب راهیسې له تیوکراټانو او جمهوري غوښتونکو عناصرو څخه جوړ دی.
(dpa)mks/aa
له آرشیف څخه: