د ایران دوه ولایتونه له سختي وچکالۍ سره مخامخ دي

څو کاله مخکي لا کهگیلویه او ویراحمد ډیر حاصل خیزه ولایتونه وو. خو نن ورځ د ايران وچکالي دغو ولایتونو ته هم رسیدلې ده.

د ایرنا خبري آژانس په حواله د دغو ولایتونو د اوبو ډیرو چینو د وچیدلو په سبب کلیوال مجبوره دي، د اوبو راوړلو په خاطر اوږدې لاري ووهي.

په دغو ولایتونو کي د کانالونو نه موجودیت او خرابي زیربنا له امله ډیر کسان ورو ورو اړ سوي، چي کلي پریږدي او ښارونو ته مخ کړي.

وچکالۍ په دې وروستیو کلونو کي د ايران د مختلفو سیمو پر نفوس باندي اغیزه کړې ده.

له دې مخکی «ایسنا» خبري آژانس هم په یوه رپوټ کي لیکلي وو، چي د کهگیلویه او ویراحمد قبیلوي ولایتونو کي د اوبو کمبود احساسیږي.

د«تسنیم» خبري آژانس په ۱۳۹۶چنگاښ میاشتې کي د دغو ولایتونو د اوبو د ۲۱۰ چینو له وچیدو څخه رپوټ ورکړی وو.

دلویو ننگونو له جملې څخه چي ايران ورسره مخامخ دی، د کارپوهانو په خبره د اوبو د کمښت بحران دئ.

د اقليم ساتني کارپوهانو په خبره په تیرو ۲۰کلونو کي اقلیمي بدلونونه او د سانتي گراد ۶ درجې تودوخه دایران د ځینو برخو د وچکالۍ اصلي علت دی.

د ملگرو ملتونو د اټکلونو له مخي د نړۍ د اوبو ذخیرې به په راتلونکو ۱۵ کلونو کي ۴۰ سلنه راکمي سي.