د نړۍ مهم خبرونه په متن او انځور کې

د کاتالونيا پخوانی سيمه يز مشر، کارلېس بوجدمون، په آلمان کې نيول شوی دی. د شلېسويګ هولشتاين د آيالتي جنايي ادارې يوه وياند وويل چې د لويو لارو پوليسو بوجدمون له غرمې مخکې نيولی دی. د هغه د ګوند او د مدافع د وکيل د څرګندونو په حواله هغه دنمارک څخه د وتلو پر مهال د سرحد په اوږدو کې درول شوی دی. داسې ويل کيږي چې پوجدمون له فنلنډ څخه د بلجيم په لور روان و.

د آلمان د دفاع وزيرې، اورزولا فون دېر لاين، د آلمان پوځ ته ويلي دي چې په افغانستان کې د دغه ماموريت پای لا نه تر سترګو کيږي. د دفاع وزيرې، د آلمان د خبري اژانس په حواله د افغانستان په شمال کې له آلماني عسکرو څخه په ليدنه کې وويل چې افغانستان لا په دغه وضعيت کې قرار نه لري چې يوازې د امنيتي چارو مسئوليت پر غاړه واخلي. د هغې په خبره هغه په يوه مهالوېش پورې تړلی نه دی چې بايد «هسې سر ته ورسول» شي.

د امريکا په متحده آيالاتو کې په سلګونو زره کسان په هېواد کې د وسلو د لا سخت قانون په پلويتوب کوڅو او سړکونو ته راوتلي ول. په فلوريدا کې په يوه مکتب باندې تر بريد وروسته د «زموږ د ژوند له پاره مارش» تر شعار لاندې په ټول هېواد کې لاريونونه وشول. په پلازمېنه واشنګټن کې مرکزي احتجاج ته تر ټولو زيات خلک ورغلي ول.

يوه اوونۍ وروسته له هغه چې د سوريې په شمال لويديځ کې د عفرين ښار ونيسي، د ترکيې اردو د خپلو څرګندونو په حواله ټوله سيمه «په بشپړه توګه» تر کنترول لاندې راوستې ده. دغه خبر د ترکيې خبري اژانس انادولو د ترکيې د پوځي مشرتابه په حواله ورکړی دی. له مخې يې ويل شوي دي چې له بيا ستنېدونکو کسانو سره مرستې روانې دي. د ترکيې ځواکونو دوه مياشتې مخکې د کردانو د «واي پي جي» مليشې په وړاندې عمليات شروع کړي ول.

دوه تنو ځانمرګو بريد کوونکو د افغانستان په لويديځ هرات ولايت کې پر يوه مسجد باندې د بريد له کبله لږ تر لږه يو تن وژلی دی. د پوليسو په حواله اووه تنه ټپيان شوي هم دي. بريد کوونکو هڅه کړې وه چې د شيعه ګانو يوه جومات ته ورننوځي. خو داسې ويل کيږي چې هغه د ساتونکو له خوا درول شوي ول چې له کبله يې د مسجد مخکې چاودنه رامنځ ته کړې وه. د اسلامي دولت يا داعش په نوم تندلاري سازمان د دغه بريد پړه منلې ده.

اسرائيلي پوځ د خپلو څرګندونو په حواله د غزې په تراړه کې د تندلارې اسلامي حماس ډلې پر مورچل باندې بمباري کړې ده. داسې ويل شوي دي چې جنګي الوتکو د شنبې په ماښام په رفح کې د حماس په يوه پوځي اډه کې «يو تروريستي هدف» په نخښه کړی دی. د دغو څرګندونو په حواله له دې مخکې څلور تنو فلسطينيانو له اسرائيل سره غځېدلې سرحدي کټاره خرابه کړې وه او کوښښ يې کړی و چې يوه موټر ته اور ورته کړي.

په ترکمنستان کې پارلماني انتخابات روان دي. انتخاباتي مرکزونه د ځايي وخت مطابق د ماښام په اوو بجو تړل کيږي. د ۲۸۴ کانديدانو په منځ کې چې په پارلمان کې د ۱۲۵ چوکيو په سر سيالي کوي، ښايي د ولسمشر، قربان قلي بردي محمدوف زوی، مخکښه وي. ۳۶ کلن سردار بردي محمدوف غواړي چې په پارلمان کې خپله چوکۍ وساتي. هغه د کتونکو په اند د دې چانس هم لري چې د پارلمان رئيس مقرر شي.