شتاين ماير: د بیان ازادي د نورو د توهین په معنی نه ده
۱۳۹۸ آبان ۲۷, دوشنبه
جمهوررييس فرانک واټر شټاین مایر دغه خبري د پوهنتونونو د رییسانو د کلني کنفرانس پر مهال نن دوشنبه (د نومبر میاشتي ۱۸ نیټه) په هامبورگ کي وکړې او اضافه یې کړه چي د « بیان له ازادۍ څخه حتی د نورو کسانو د جسماني حملو، صحت او ژوندانه د تهدیدولو په لار کي استفاده کیږي.» خو په خبره یې دا د بیان ازادي نه ده، «بلکي ژبنی خشونت دی، چي باید مخنیوی یې وسي او مجازات سي.» هغه وويل: »ځيني کسان د بیان د ازادۍ حق د دې حق سره تغیروي، چي نور کسان په بې پروایۍ سره تحقیر او بې احترامي یې وکړي.« هغه وويل چې دغه ډله کسان اصلأ د بیان ازادي تهدیدوي.
شټاین مایر همدارنگه وویل د ځینو کسانو دا احساس چي نور د خپل نظر او عقیدې د بیانولو اجازه نه لري، نو هغه د »ژبني خشونت، تبعیض، دښځو څخه نفرت، د همجنسبازانو او یا یهودانو سره دښمنۍ ته د حق په جانب توب په معنی نه دی.»
شټاین مایر په خپله وینا کي دا هم وویل چي په خبرو او خپل نظر په بيانولو کي احترامانه طرز او رفتار د دې معنی نه لري، چي د یوې موضوع سره مخالفت ونه سي. شټاین مایر غوښتنه وکړه « هغه څه ته چي موږ ضرورت لرو، هغه د یوې موضوع سره د مخالفت کولو کلتور دی، چي باید زده سي.» د مخالفت کولو دغه کلتور جرأت او خونسردۍ ته ضرورت لري.»
هغه زياته کړه د دې برعکس نور انسانان چوپ پاته کیدلو ته مجبورول، ځکه چي هغوی خپله جهان بیني لري، د منلو وړ نه ده.
شټاین مایر، د پوهنتونونو د رییسانو په مخکي هیله څرگنده کړه چي پوهنتونونه په یوه داسي ځای باندي تبدیل کړي، په کوم کي چي د«مخالفت کولو کلتور» بیرته زده سي.