عيني شاهدان: په سودان کې پر نارينه و او ښځو جنسي تېری کيږي
۱۳۹۸ خرداد ۱۸, شنبه
د ښځو د حقونو فعاله ناهيد جبرالله له دويچه ويله سره په خبرو کې وايي چې پر ځوانو سودانۍ ښځو باندې ډېر شمېر د جنسي تېري پېښې ثبت شوې دي. شکمن عاملين يې د «چټک ملاتړ ځواکونو» په نوم د يوې نيمه پوځي مليشې غړي دي چې د سودان په امنيتي ادارو پورې اړه لري. هغه په هغو مليشو پورې هم تعلق لري چې د پوځ په امر د پاڅون کوونکو ولسونو پر ضد جګړه کوي او د دارفور په کورنۍ جګړه کې يې هم له بشري حقونو څخه ډېرې سرغړونې کړې وې. هغه د ډېرو کلونو راهيسې د سودان د پوځ له خوا په دنده ګومارل کيږي.
د ربړول شوو ښځو مړي
په دغه ځانګړې مرکه کې مېرمن جبرالله پر ښځو او نارينه و له جنسي تېريو څخه خبرې وکړې. د هغې په وينا د نيل له سيند څخه راويستل شوي ځينې مړي د هغو ښځو دي چې جنسي تېری ورباندې شوی وو. دغې عيني شاهدې دا هم ويلي دي چې «داسې د جنسي تېري موارد هم ثبت شوي دي چې په روغتونونو کې يې صورت نيولی دی». خو د هغې په خبره تر اوسه لا ډېره سخته ده چې دقيقې شمېرې په ګوته شي ځکه چې په سيمه کې د انترنېټ امکانات قطع شوي دي او د تليفون ليکه هم ثابته نه ده. کله چې پوځ په خرطوم کې د خلکو د پرلت ضد اقدام کاوه، جبرالله د پېښې په ځای ځايګي کې حضور درلود. د هغې په خبره مظاهره چيان په تاوتريخوالي سره وپاشل شول چې له ډزو، اوبو شيندونکو او اوښکي بهونکي ګاز څخه کار واخيستل شو. جبرالله او ځينې نور فعالين ورسره په يوه څېرمه پرته ودانۍ کې پټ شول.
Emad Hassan/NS/BS