ممبي اوبو لاندی کړی دی

د هندوستان په ممبي ښار کې د موسمي بارانونو له کبله د یوه دیوال د نړیدو په ترڅ کې د ۱۵ کسانو د مړینې رپوټونه ورکول کیږي. د ځایي چارواکو په وینا د دیوال د نړیدو له کبله ۷۰ تنه ټپیان شوي هم دي.

د ممبي په نورو سیمو کې هم د ورښتونو له کبله د درو تنو د مړینې رپوټونه ورکول کیږي. د خراب موسم له کبله د تلفاتو د ډېرښت اندېښنه هم ده.

ځایي چارواکو د عامې رخصتۍ اعلان کړی دی او له خلکو یې غوښتي دي چې په خپلو کورونو کې پاتې شي. ښوونځي او کالجونه بند دي او تر سلو زیات پروازونه لغوه کړل شوي دي.

په ممبي کې د هوا پيژندنې ادارې ویلي دي چې په تیرو دوو ورځو کې په تیره لسیزه کې تر ټولو زیات بارانونه ثبت شوي دي.

په تلویزيون کې په ښوول شوو انځورونو کې لیدل کیږي چې کورونو ته اوبه ورننوتي دي.

په هندوستان کې له جون تر ستمبر میاشتې پوري هرکال موسمي بارانونه زیانونه اړوي. ځینې ودانۍ چې بنیادونه یې کمزوري دي، د ورښتونو له کبله نړیږي. ډیرې سیمې د سختو ورښتونو په پایله کې تر اوبو لاندې کیږي.