هریس ویلي چې د واک سوله ایز لیږد له پاره به همکاري وکړي
۱۴۰۳ آبان ۱۷, پنجشنبه
هریس خپلو پلویانو ته په دغه وینا کې وویل چې د «د ټاکنو پایلې منم» . هریس خپلو پلویانو ته په وینا کې وویل چې تر هغې پورې له خپلې مبارزې لاس مه اخلئ، تر څو چې نړۍ په یوه ښه ځای بدله شوې نه وي.
د امریکا متحدو ایالاتو د ولسمشر مرستیالې کمالا هرېس په خپله وینا کې زیاته کړه: « د ټاکنو پایلې هغه څه نه دي چې موږ غوښتل، نه هغه څه دي چې موږ مبارزه ورته وکړه او رایه مو ورکړه.» خو هریس خپلو پلویانو ته یادونه وکړه: »ماته غوږ شئ تر هغې چې موږ مبارزه کوو او نه تسلیمیږو، د امریکا د ژمنو څراغ به روښانه بلیږي.«
هریس وویل چې هغه به د جمهوري پال ډونالډ ټرمپ سره د ۲۰۲۵ په جنوري کې د واک د سوله ایز لیږد لپاره همکاري وکړي "د هغه څه برعکس چې موږ په ۲۰۲۰ کې ولیدل."
کله چې ټرمپ د ۲۰۲۰ میلادي کال د بایډن په مقابل کې د ولسمشرۍ ټاکنې وبایللې، هغه د انتخاباتو پایلې نه منلې او د درغلیو ادعا یې کوله.
هریس ټرمپ ته مبارکې ویلې
د رسنیو د راپورونو له مخې کاملا هریس د وینا له خپریدو څو ساعته مخکې خپل سیال ډونالډ ټرمپ ته د ټاکنو د ګټلو مبارکي ورکړه.
د ډیموکرات ګوند یوه لوړ پوري چارواکي چې نه یې غوښته نوم یې واخیستل شي ویلې، چې د هریس وینا په ټوله کې د سوله ایز واک د تسلیمیدو په اړه وه.
تېره ورځ د امریکا د جمهوري ریاست په ټاکنو کې پخواني ولسمشر ډونالډ ټرمپ د دیموکرات ګوند کاندیدې کاملا هریس ته ماتې ورکړه او د امریکا ۴۷م ولسمشر شو.