هند ولې د روسي توغندویو پيرلو ته لیواله دی؟

د دغه تړون تر لاسلیک کیدو وروسته د روسیې ولسمشر ولادیمیر پوتين او د هند لومړي وزیر نریندرا مودي د خپلمنځي اړیکو د لا زیاتو پراخولو خبر ورکړ. دا په روان (۲۰۱۸) ميلادي کال کې د دواړو مشرانو دریمه لیدنه کتنه ده.

د پوځي سرچينو په خبره د اس۴۰۰ ډوله هوایې توغندیو دفاعي سیستم د ۴۰۰ کیلومترو په واټن کې په یو وخت د ۴۰۰ هدفونو د تشخيص او په عين وخت کې له ۱۲ هدفونو سره د مقاومت توان لري. دا هدفونه کیدای شي جنګي الوتکې، کروز توغندي او یا هم بالیستیک توغندي وي. دا سیستم په اوس وخت کې په نړیواله کچه د هوایي دفاع په برخه کې یو له تر ټولو مودرنو سیستمونو څخه دی.

هند د خپلواکۍ راهیسې تر اوسه پورې څلور ځله له پاکستان او یو ځل له چين سره په جګړه کې ښکیل شوی دی. د هند پوځ له نږدې یو میلیون ۳۰۰ زره پرسونل سره د نړۍ په سترو پوځونو کې راځي. هند د روسي وسلو یو له پخوانیو پیریدونکو څخه دی.

پر دغه سیستم د هندي پوځ سمبالیدل له یوې خوا له چين او له بلې خوا له پاکستان سره په سیمه کې د قواو د توازن د تامين په برخه کې ډیر مهم دي.

هند د هوایي دفاع پر دغه سیستم سربیره د خپلو سمندري ځواکونو د پیاوړي کولو له پاره له روسیې څخه څلور جنګي بیړۍ هم پیرلي دي. د هند سمندري ځواکونو تر اوسه پورې ۶ داسې بیړۍ رانیولي دي.

دواړو مشرانو په نوي ډهلي کې په هندوستان کې د ۸ اټومي بټیو د جوړولو تړون هم لاسلیک کړ. فضاء ته د هند د ستور مزلو استول هم له هغو مواردو څخه وو چې دواړو مشرانو یې په اړه موافقه وکړه.

د سړې جګړې پر مهال د هند د اړتیا وړ وسلو ۸۰ سلنه د پخواني شوروي اتحاد له خوا تامينېده. آیا د دې نویو تړونونو لاسلیک کول به د تیرو وختونو سیاست ته د بیرته ګرځیدو په معنی وي؟

د "CAATSA" په نوم د قانون له مخې چې تیر کال د امریکا د ولسمشر دونالد ترمپ له خوا لاسلیک شوی وو، که یو هیواد له روسیې سره پوځي یا اطلاعاتي (استخباراتي) اړیکي ولري، کیدای شي د امریکا له بندیزونو سره مخامخ شي. د امریکا د دفاع وزارت سلاکار راندال شریور، وویل: «دا موضوع چې هند غواړي له روسیې څخه اس ۴۰۰ ډوله توغندي وپیري، له مختلفو اړخونو څخه د اندیښنې وړ ده.»