هندوراس هم غواړي خپل سفارت بیت المقدس ته انتقال کړي
۱۳۹۹ مهر ۱, سهشنبه
د هندوراس جمهور رئیس یوان اورلاندو هیرناندیس تیره یکشنبه (د سپټمبر میاشتي ۲۰ مه) د خپل تویتر په یوه پیغام کي ولیکل چي «پر دغه اقدام هغه همدا اوس د اسرائیلو د صدراعظم نیتانیاهو سره موافقه کړی» او د همدې عیسوي کال تر پایه پوري به سفارت هلته انتقال سي.
اسرائیل چي په اوس وخت کي هیڅ سفارت په جنوبي امریکا کي نه لري، په عین وخت کي به د هندوراس په پایتخت کي یو سفارت افتتاح کړي.
د تیر عیسسوي کال د سپټمبر پر اوله، د اسرائیلو تر انتخاباتو لږ دمخه د هیرناندیس او نیتانیاهو په حضور کي هندوراس په بیت المقدس کي یو ډیپلوماتیک دفتر پرانیستی. هندوراس هغه وخت یروشلم ته د اسرائیلو د پایتخت خطاب وکړ. ویل کیدله چي د دغه دفتر پرانسیتل، بیت المقدس ته د دغه هیواد د سفارت د انتقالولو په معنی دی. د هندوراس سفارت تر اوسه پوري په تل ابیب کي موقعیت لري.
د امریکا متحده ایالاتو جمهوررئیس، دونالد ترمپ د ۲۰۱۷ م کال په دسمبر میاشت کي په یوه تاریخي اقدام او یوازي سر بیت المقدس د اسراییلو د پایتخت په حیث په رسمیت وپیژندی. د ۲۰۱۸ م کال په می میاشت کي بیا امریکا خپل سفارت د تل ابیب څخه بیت المقدس ته انتقال کړ. خو دغه دواړه قدمونه د بین المللي ټولني او خاصتأ فلسطینیانو له خوا تر سختو انتقادو لاندي راغلل.
د امریکا تردې اقدام لږ وروسته د جنوبي امریکا بل هیواد، ګواتیمالا هم خپل سفارت بیت المقدس ته انتقال کړ.
دا هم پداسي حال کي ده، چي بیت المقدس د درو مشهورو ادیانو، لکه اسلام، عیسویت او یهودیت مرکز هم دی. د ۱۹۶۷م کال راهیسې اسرائیل د بیت المقدس د غربي برخي تر څنګ شرقي عربي برخه هم کنټرولوي، ځکه نو د دغه ښار موقف د منځني ختیځ د شخړي اصلي موضوع ده.
خو اسرائیل بیت المقدس ته د خپل «دایمي او نه تقسیمیدونکي پایتخت» په سترګه ګوري او د بیت المقدس شرقي برخه د فلسطینیانو د یوه مستقل راتلونکي دولت په حیث ردوي. د نړیوالې ټولني د اکثریت برخي په نظر بیا د بیت المقدس موقف باید د اسرائیلو او فلسطینیانو ترمنځ د سولي په راتلونکو خبرو کي تثبیت سي.
زموږ له آرشیف څخه: