پاکستان له روسيې سره په ارزانه بیه د تيلو واردولو توافق کړی

په ټيټه بيه د تيلو د پېرلو دغه معامله د جمعې په ورځ د پاکستان او روسيې د انرژۍ وزيرانو له خوا په اسلام آباد کې اعلان شوه. دغه اعلان د دواړو حکومتونو تر منځ تر درو ورځو خبرو اترو وروسته وشو.

دغه توافق په داسې حال کې کيږي چې مسکو د خپلې انرژۍ د صادرولو له پاره د مشتريانو د موندلو په هڅه کې دی ځکه چې غربي هیوادونه پر اوکراین د مسکو تر پوځي يرغل وروسته د غیر روسي تيلو او انرژۍ په لټه کې شوي دي.

پاکستان له روسیې څخه ۳۰۰ زره ميترک ټنه غنم رانيسي

د روسيې د انرژۍ وزير، نيکولای شولګينوف وویل چې پاکستان به انرژي د دوستو هیوادونو په پيسو رانیسي خو کوم نوم يې مشخصه نه کړ.

پاکستان او روسيې د انرژۍ پر سر مذاکرات، تيرکال وروسته له هغې چې مسکو پر اوکراین پوځي يرغل وکړ او په ادامه ېې لويديځ پر مسکو بندیزونه وضع کړل، پیل کړل. د پاکستان د انرژۍ وزير، مصدق ملک، تر غونډې وروسته وويل چې پاکستان ته به د تيلو واردات په احتمال سره له مارچ مياشتې څخه دمخه پيل شي.

پاکستان هڅه کوي له امريکا سره اړيکي پراخي کړي

د آلمان خبري آژانس د رپوټ پر اساس، دغه معامله به له ۲۲۰ ميلیونه نفوس لرونکي هیواد پاکستان له ناوړه اقتصاد سره مرسته وکړي، چې د سقوط په حال کې دی. پاکستان په دې هڅه کې وو او دی تر څو د انرژۍ مخ په لوړېدونکي بلونو د راټيټولو له پاره مناسبې لارې چارې پېدا کړي.

په اسلام آباد کې د يوراسیا سينچري انستيتوت څخه د چارو کارپوه، عرفان شهزاد وايي: «ظاهراً دا د دواړو هیوادونو له پاره یو ګټونکی-ګټونکی وضعیت دی.»

ايا چين او روسيه به د نړۍ نظام بدل کړلای سي؟

خو هغه مشخصاً د پاکستان په هکله وويل: «اما د پاکستان له پاره به دا يو څه ریسک له ځانه سره ولري. د اسلام آباد غربي متحدین او د سوداګرۍ لوی شريکان به دې سره د راحتۍ احساس ونه کړي.»

پاکستان د سړې جګړې او پر افغانستان د روسيې د پوځي يرغل پر مهال، په سیمه کې د غربي بلاک یو مهم متحد هیواد وو. د پاکستان دغه رول ته تقريباً د پخواني شوروي اتحاد د پاشل کېدو د کلیدي دلیل په سترګه هم کتل کيږي. خو روسيه او پاکستان په وروستيو کلونو کې خپله ترخه ماضي هيره کړې او يو بل ته ډير ورنژدې شوي دي.

د روسیې په تړاو ليک ته د عمران خان غبرګون: «موږ د چا غلامان نه يو»

 mks/mns/(dpa)

دلته له آرشیف څخه یو انځوریز البوم هم کتلی شئ(07.04.2022):