په کابل کي پر يوه مېلمستون باندي په بريد کي يوه نجلۍ وژل سوې ده
۱۳۹۳ فروردین ۸, جمعه
د افغانستان د کورنيو چارو وزارت مرستيال وزير ايوب سالنگي ويلي دي چي په دغه يرغل کي يوه کوچنۍ نجلۍ وژل سوې ده او يو تن پوليس ټپي سوی دی.
تر دې دمخه د پوليسو یوه چارواکي چي نه يې غوښتل نوم يې واخيستل سي د آلمان خبري آژانس ته ويلي دي چي د دغو څلور تنو يرغل کوونکو له ډله څخه يوه يې د مېلمستون په دروازه کي ځان چولی دی او درې تنه نور د مېلمستون په ننوتلو توانېدلي دي. دغه چارواکي زياته کړې ده چي دوه تنه يرغل کوونکي د مېملستون په دننه کي د امنيتي ځواکونو له خوا وژل سوي دي او دريم لا مقاومت کوي.
د کورنيو چارو وزارت دغه چارواکي ويلي دي چي تر اوسه پوري پوليسو له دغه مېلمستون او شاوخوا سيمي څخه ۲۰ تنه بهرنيان چي کوچنيان هم پکښې شامل دي را ايستلي دي. پوليسو ويلي دي هغه خارجيان چي دوی را ايستلي دي امريکايان، استراليايان او افريقايان دي.
تر دې دمخه امنيتي چارواکو ويلي ول چي له دغه مېلمستون څخه شپږ تنه بهرني وگړي د گاونډي کور له لاري په تېښتي بريالي سوي دي. د کابل د پوليسو قوماندان ويلي دي چي وسله وله نښته اوس هم روانه ده. امنيتي چارواکو تر اوسه پوري د تلفاتو په اړه څه نه دي ويلي.
د پيښه پړه وسله والو طالبانو پر غاړه اخيستې ده. د دغي ډلي يوه وياند ذبيح الله مجاهد رسنيو ته په لېږلي پيغام کي ويلي دي چي د دوی جنگياليو په کابل کي پر يوې کليسا باندي يرغل کړی دی.
هغه لیکلي دي «د مجاهدينو يوې ډلي په کابل کي پر هغي ودانۍ باندي يرغل کړی دی چي ظاهراً د خارجيانو د اوسېدو ځای ښکارېدی، خو په واقعيت کي دلته يوه کليسا وه چي افغانان يې مسيحيت ته رابلل.»
دا په درو ورځو کي په کابل کي دوهم وسله وال يرغل دی چي ترسره کيږي. په پلان کي ده چي د اپريل مياشتي پر پنځکه نېټه به په افغانستان کي د ولسمشرۍ او ولايتي شوراگانو ټاکني ترسره سي.