په ۲۰۲۲م کال کې د ژوند له پاره د نړۍ غوره ښارونه

د کرونا تر محدوديتونو وروسته ويانا له ۱۰۰ څخه د ۹۹،۱ نمرو په ترلاسه کولو سره يو ځل بيا «د ژوند له پاره د نړۍ د بهترينو ښارونو» د جدول په سر کې ځای خپل کړ. دې ښار چې په تېرو څو کلونو کې یې تل لومړی ځای ګاټه، تېر کال دولسم مقام خپل کړی وو. د اي آې يو موسسې د ۲۰۲۱م کال په درجه بندۍ کې د نوي زيلند اوکلند ښار لومړی مقام ګټلی وو. اوکلند سږ کال په دريمه او څلورمه رده کې ځای خپل کړی دی.

د ۲۰۲۲م کال په درجه بندۍ کې چې د پنجشنبې په ورځ (۲۰۲۲م کال د جون ۲۳مه) نشر شوه، کوپنهاګن ښار د روغتيا په برخه کې له سلو څخه د ۹۵،۷ نمرو، د کلتور په برخه کې د ۹۵،۴ او زده کړو او زيربنا په برخو کې د سلو سلو نمرو په اخيستو سره په شاخص کې ۹۸ نمرې ترلاسه کړي او دويم مقام یې خپل کړی دی.

زوريخ د سويس تر ټولو ستر ښار دی چې په شاخص کې د ۹۶،۳ نمرو په اخیستو سره يې د کاناډا د ګلګري ښار سره يوځای د ژوند له پاره د نړۍ د دريم ښه ښار مقام خپل کړی دی. په دې ښار کې د ژوند غوره کيفيت د دې سبب شوی چې زورخ هر ځل د دې نوملړ لومړي مقامونه خپلوي.

د کاناډا د البرتای ایالت ستر ښار کلګري په دې تېرو څو کلونو کې د ژوند له پاره د ښو ښارونو په نوملړ کې ثابت ځای درلود او سږ کال یې هم د سويس د زوريخ ښار سره يوځای د ۹۶،۳ نمرو په ترلاسه کولو دريم مقام خپل کړی دی. کلګري د انژرۍ مرکز او د کاناډا يو مهم تجارتي ښار بلل کیږي.

وينکوور له ۲۰۰۲م کال څخه تر ۲۰۱۰م کال پورې «د ژوند له پاره د ښو ښارونو» په شاخص کې لومړی مقام درلود او په ۲۰۱۵م کال کې يې يو ځل بيا لومړی مقام خپل کړی وو. دې ښار دا ځل هم د يو څه کمښت سره سره هم د ۹۶،۱ نمرو په ترلاسه کولو سره پنځم مقام خپل کړی دی.

دا ښار د سويس په فرانسوي ژبې سيمه کې پروت دی او تل د ملګرو ملتونو، اروپايي ټولنې او سره صليب کمېټې د غونډو کوربتوب کوي. دې ښار د ۹۵،۹ نمرو په ترلاسه کولو سره د ژوند له پاره د ښو ښارونو په دې نوملړ کې شپږم ځای ګټلي دی. ژنيو د روغتيا په برخه کې له سلو څخه سل نمرې اخيستي دي.

د اکونوميست د ۲۰۲۲م کال په دې نوملړ کې د آلمان درې ښارونه فرانکفورت، هامبورګ او دوسلدورف ګټونکي دي. فرانکفورت اووم، هامبورګ شپاړسم او دوسلدورف په دې درجه بندۍ کې ۲۲ ځای خپل کړی او په دې دريو ښارونو کې د ژوند وضعيت ۳۰ رتبې پرمختګ کړی دی.

تورنتو ښار د ۹۵،۴ نمرو په ترلاسه کولو سره د ژوند له پاره د شمالي امريکا په ښو ښارونو کې شامل دی. د کاناډا پلازمينې د زده کړې او روغتيا په برخه کې له سلو، سل نمرې ترلاسه کړي دي. د دې ښار تر ۵۰ سلنه ډېر وګړي له کاناډا څخه دباندې زيږيدلي او په دې ښار کې د ۲۳۰ بيلو قومونو خلک ژوند کوي.

امستردام ښار چې تېر کال یې ۱۵م مقام درلود، سږ کال یې نهم مقام ته پرمختګ کړی دی. دا ښار توانيدلی ۹۵،۳ نمرې په لاس راوړي. امستردام د روغتيا په برخه کې ۱۰۰ نمرې اخیستي دي.

اوساکا ښار چې تېر کال یې دويم مقام خپل کړی وو، سږ کال د استراليا د ملبورن ښار سره په شريکه لسم مقام ته راکښته شوی دی. د جاپان دا ستر اقتصادي ښار د تازه او باکيفيته خوړو، ثبات او جنايي جرمونو د ټيټې کچې او همدا راز د روغتيا د ښو خدماتو له کبله شهرت لري.

ملبورن مخکې تر هغې چې په ۲۰۱۸م کال کې یې خپل مقام ويانا ته وبايله، اوه کاله پرله پسې د ژوند له پاره د ټر ټولو ښه ښار په توګه معرفي شوی وو. ملبورن چې سږ کال یې د جاپان د اوساکا ښار سره په شريکه لسم مقام خپل کړی دی، د زده کړو او زيربنا په برخه کې یې سل نمرې اخیستي دي.