کرېکټ: هند تر کلونو وروسته د پاکستان کوربتوب کوي

د فرانس پریس په حواله، دغه سیالۍ به د اکتوبر په پنځمه په حیدر آباد کې د نړۍ په تر ټولو ستر لوبغالي کې د اینګلند او نیوزیلند تر منځ لوبې سره پیل شي. په پام کې ده چې د دغه جام پایلوبه هم په همدغه لوبغالي کې وشي.

د هند او پاکستان سیالي چې تر ټولو ډېره انتظار لرونکې بلل شوې، د اکتوبر په ۱۵مه به ترسره شي. هند به تر دې مخکې د اکتوبر په ۸مه له استراليا سره خپل بخت وآزمويي.

د لوبو د مهالویش اعلان په دې دلیل د اونیو له پاره وځنډېډ چې پاکستان هندوستان ته له سفر کولو انکار کاوه. جوړجاړی وروسته له هغې رامنځ ته شو چې پاکستان په سپتمبر کې د ېوې هایبريدي ماډل آسیا کپ سیالیو له کوربتوب سره موافقه وکړه.

ورته نور ولولئ: په آی پي ال کې بهرني لوبغاړي څومره پيسې ګټي؟

د پاکستان کرېکټ بورډ (پي سي بي) ويلي دي چې ټيم ېې په هندوستان کې د لوبو کولو له پاره د اسلام آباد تائيدۍ ته اړتيا لري.

د پاکستان د کرېکټ بورډ د اړيکو مشر، سميع الحسن وويل: «موږ د لارښوونو له پاره له خپل حکومت سره په اړيکه کې يو.» حسن زیاته کړه:«څو اوونۍ مخکې د کريکټ نړېوالې شورا موږ سره د مهالویش طرحه شریکه او [په اړه ېې] زموږ نظر وغوښت، چې دا موقف له هماغه سره مطابقت لري.»

د کرېکټ نړېوالې شورا، د اکتوبر نړېوال پنځوس اوریز جام له پېل څخه ۱۰۰ ورځې مخکې په یوه اعلاميه کې وويل چې په دغه ټورنمنټ کې به لس لوبډلې ګډون ولري چې د ۴۶ ورځو په جریان کې به په ۱۰ ځایونو کې ۴۸ سيالۍ ترسره کړي. سرچېنې زیاته کړې چې د دغو لسو لوبډلو ترمنځ د راونډ رابين مرحلې وروسته به څلور غوره لوبډلې نیمه پایلوبې ته لار پېدا کړي. 

ورته نور ولولئ: کرېکټ؛ آسترالیا له افغانستان سره د لوبو سیریز لغوه کړ

په کرېکټ کې د پاکستان او هند ترمنځ لوبې ډېر کتونکي لري چې د نورو په پرتله له احساساتو هم ډېرې ډکې وي. د ۲۰۱۹م کال پنځوس اوريز نړیوال جام کې د هند او پاکستان تر منځ لوبه ۲۷۳ میلیونه خلکو کتلې وه.

د هند او پاکستان د کرېکټ ټیمونو له ۲۰۱۲م کال راهیسې په خپلو کې د یو بل په خاوره کې سيالۍ نه دي کړي. د دواړو هیوادونو ترمنځ همدارنګه له ۲۰۰۷م کال راهیسې تيست لوبې هم نه دي شوي. پاکستان به د ۲۰۱۶م کال د شل اوریز نړېوال جام سیالیو وروسته، سږکال د لومړي ځل له پاره د هندوستان په خاوره کې لوبه کوي.

د هند او پاکستان د کرېکټ په څرنګوالي کې د دواړو هیوادونو تر منځ د اوږدې مودې کړکيچن سیاسي مناسبات هم رول لري.

ورته نور ولولئ: متحده عربي امارات به راتلونکو پنځو کلونو کې د افغانستان د کريکت «کور» وي

(AFP)mks/bs

د کرکيټ پر موضوع له آرشیف (21.02.2017) څخه یو انځوریز البوم: