Лідэр Моладзі БНФ сілай адпраўлены ў войска
28 января 2009 г.
У сераду, 27 студзеня, на адной з мінскіх вуліц быў затрыманы лідэр Моладзі БНФ, сябра Сойму Партыі БНФ Франак Вячорка. Як паведамілі ў ваенкамаце Савецкага раёна сталіцы, яго адвезлі ў вайсковую частку горада Баранавічы Брэсцкай вобласці, дзе маладзён мае несці службу ў 8-й радыётэхнічнай брыгадзе.
Як адзначыў у інтэрв’ю Deutsche Welle бацька актывіста, першы намеснік старшыні Партыі БНФ Вінцук Вячорка, малады чалавек меў адтэрміноўку ад прызыўных мерапрыемстваў як мінімум яшчэ тыдзень. Паводле словаў палітыка, у сераду Франак Вячорка быў схоплены невядомымі ў горадзе. У ваенкамаце Савецкага раёна Мінска падпалкоўнік Загорскі заявіў Вінцуку Вячорку, што Франак адпраўлены ў войскі ў горад Баранавічы.
Бацька Франака Вячоркі лічыць, што супрацоўнік ваенкамата парушыў заканадаўства. Ён ацэньвае такія дзеянні "як дэманстрацыю на вачах усёй Беларусі, усяго беларускага грамадства, Еўропы, якая так марыць пра дыялог з Лукашэнкам, ягонага сапраўднага стаўлення да законаў і Канстытуцыі".
Па словах першага намесніка старшыні Партыі БНФ Вінцука Вячоркі, зараз па факце адбытага рыхтуецца скарга ў Генеральную пракуратуру Беларусі. "Такога нахабства пры парушэнні правоў я, прызнацца, нават не мог сабе ўявіць", - адзначыў палітык. (гк)