Aleanca e salafistëve në Egjipt

Emad Abdel Ghaffur bëri të ditur në fillim të vitit në Kajro se do të hapë një kapitull të ri. Ish-kryetari i partisë egjiptiane Al-Nour ("Drita") duket se është ngopur me luftërat brendapartiake, me të cilat është përballur muajt e fundit. Grindjet më të mëdha janë zhvilluar rreth rolit të klerikëve fetarë në marrjen e vendimeve politike. Ghaffuri si njeri pragmatik vendosi të japë dorëheqjen. Në vend të partisë Al-Nour ai e ka themeluar partinë Al-Watan ("Vendlindja"), në të cilët deri tani ka mbledhur 100 anëtarë.
Më shumë parti salafiste
Në këtë mënyrë u zgjerua spektri i partive salafiste në Egjipt. Krahas partisë "Drita", partisë shumë më të vogël "Autentike" dhe "Partisë për Ndërtim dhe Zhvillim", zgjedhësit egjiptianë tani kanë në dispozicion edhe partinë "Vendlindja". Ndërkohë që edhe ultrakonservatori i angazhuar në televizion Hasem Abu Ismail, ka bërë të ditur se do të themelojë një parti të re. "Të dy këto parti duan të luftojnë së bashku për vlerat salafiste", pohon profesori Günter Meyer.
Një impuls politik nga partitë e reja pret edhe Hamadi El-Aouni, hulumtues në Universitetin e Lirë të Berlinit. Por një parti e re politike me orientim salafist nuk do ta ndryshojë skenën politike në Egjipt. "Këtu kemi të bëjmë vetëm me emra të rinj dhe jo me programe", shpjegon ai. Ndërsa Günter Meyer shton: "Në dallim prej partive laike, të cilat e luftojnë njëra-tjetrën, partitë salafiste angazhohen për unitet."
Influenca dhe (mos)uniteti
"Aleanca islamike" nga tri partitë e vjetra salafiste ka fituar në zgjedhjet e fundit parlamentare (ndërkohë të shpallura si të pavlefshme) rreth 25 % të votave. El-Aouni dhe Meyer llogarisin se këto parti do të shënojnë rezultate të mira edhe në zgjedhjet e ardhshme dhe se luftërat e brendshme politike nuk do ta dëmtojnë imazhin e tyre.
Mjerimi ekonomik i vendit i shkon në favor partive salafiste, mendon Hamadi El-Aouni. "Salafistët janë në gjendje që t'i mobilizojnë anëtarët dhe simpatizantët e tyre më lehtë", thotë ai. Egjipti po vuan edhe nga papunësia e lartë, varfëria dhe mungesa e sigurisë. "Tani është lehtë që të blesh votën e dikujt për një litër vaj apo një thes miell. Salafistët po e bëjnë këtë në mënyrë shumë të organizuar dhe jo në mënyrë spontane."
Politika dhe propaganda
Salafistët janë konsideruar në kohën e presidentit Hosni Mubarak si apolitik. Qysh pas rrëzimit të pushtetmbajtësit gjendja ka ndryshuar rrënjësisht. "Tani islamistët kanë ardhur në pushtet", thotë El-Aouni dhe shton: "Jo vetëm në politikë por edhe ekonomi dhe në administratë. Kjo do të thotë se ata kanë mundësi, të cilat nuk i kanë pasur më parë."
Salafistët po i shfrytëzojnë këto mundësi. "Ata punojnë me metoda të ndryshme", thotë El-Aouni. "Ata kanë fetarë që përhapin idetë e tyre, kanale televizive, radio dhe gazeta - pra një varg mjetesh për propagandë efektive. Këtu duhet shtuar se salafistët kanë edhe shumë para dhe mbështetje nga vendet e tjera - në radhë të parë nga vendet e Gjirit Persik." Por salafistët nuk duan që me të vërtetë të hapin një kapitull të ri. Shimca prej tyre kërkon kthimin e kohës së islamizmit të vjetër.