110510 D Bundeskabinett Euro-Krise

Në thelb bëhet fjalë për mbrojtje nga risku prej 720 miliardë eurosh. Nëse kjo shumë do të nevojitet vërtet, aktualisht askush nuk mund ta vlerësojë me seriozitet. Vëllimi i mundshëm i kredisë përbëhet nga tri pjesë: 60 miliardë vihen në dispozicion nga BE-ja; paratë sigurohen nga buxheti i përbashkët i vendeve anëtare. Maksimalisht 440 miliardë euro duhet të vihen në dispozicion nga vendet e veçanta.

Sinjal për besim te stabiliteti i Euros

Pjesa e Gjermanisë bazuar në fuqinë e saj ekonomike do të ishte 28 për qind, ose 123 miliardë euro. Dhe së fundi FMN-ja do të kontribuonte në rast nevoje me 220 miliardë euro. Në mënyrë që Gjermania të marrë pjesë në formën e rënë dakord në të ashtuquajturën 'parashutë e euros', duhet të miratohet një ligj përkatës. Projektligjin e miratoi qeveria gjermane nën drejtimin e kancelares Angela Merkel në një takim të kabinetit të martën (11.5.). Një nga zëdhënësit e qeverisë, Christoph Steegmans, deklaroi:

"Këto masa dërgojnë një sinjal të qartë se tregjet financiare mund të kenë besim tek stabiliteti financiar në Eurozonë dhe se spekulimet kundër saj nuk janë me fitim."

Zëdhënësi i Ministrisë së Financave, Michael Offer, shpjegoi se si do të funksiononte në rast nevoje transferta financiare për vendet në nevojë të Eurozonës:

"BE do të merrte kredi. Kreditë do të ripaguhen nën kushte të rrepta, në mënyrë që nga kredimarrja të prekej vetëm buxheti i BE-së. Me sa shoh unë deri tani shtetet e veçanta nuk do të prekeshin prej saj."

'Ne mbrojmë paratë e njerëzve në Gjermani'

Kancelarja Angela Merkel i mbrojti masat e ndërmarra nga qeveria gjermane, duke iu përgjigjur kritikave që kanë ardhur edhe nga radhët e veta. Vetëm pak orë pas takimit të ministrave të financave të BE-së, kancelarja gjermane e cilësoi paketën e shpëtimit "një rast unik në historinë e euros dhe BE-së":

"Në mbrojmë monedhën tonë në një situatë të jashtëzakonshme. Ose mund t'ua shpjegoja kështu qytetarëve: ne mbrojmë paratë e njerëzve në Gjermani."

Aksioni i shpëtimit të euros do të kalojë rrugën e zakonshme legjislative. Nëse socialdemokratët si forca më e madhe opozitare do të votojnë për ligjin është ende e hapur. Në votimin për ndihmën për Greqinë socialdemokratët abstenuan pasi qeveria nuk ishte e gatshme të pranonte vendosjen e një taske mbi transaksionet financiare. Edhe miratimin për paketën e shpëtimit për euron ajo pritet ta kushtëzojë me këtë kërkesë. Ka të ngjarë që Partia Socialdemokrate këtë herë të ketë edhe mbështetje nga kampi i partive qeverisëse. Disa politikanë konservatorë janë ndërkohë të gatshëm të pranojnë taksën mbi transaksionet financiare. Vetëm demokratët e lirë të partnerit në koalicion FDP vazhdojnë ta refuzojnë kategorikisht këtë taksë.

Autor: Marcel Fürstenau/ Eliana Xhani

Redaktoi: Auron Dodi