Gjermania do t'i japë fund priorizimit për vaksinat

Gjermania do të heqë dorë deri në qershor nga vendosja e përparësive për vaksinimin sipas grupmoshave, tha kancelarja Angela Merkel pasi diskutoi të hënën me krerët e 16 landeve të Gjermanisë.

"Kjo nuk do të thotë që të gjithë mund të vaksinohen menjëherë," tha Merkel. "Por që të gjithë mund të zënë radhën duke u regjistruar tek qendrat e vaksinimit për t'u vaksinuar sipas mundësisë së furnizimeve," shtoi kancelarja.

Merkel gjithashtu paralajmëroi që Gjermania mund të përballet me një debat të vështirë shoqëror, sepse pjesa e popullsisë që vaksinohet mund të kërkojë më shumë liri.

"Ne do të hyjmë në një fazë tranzicioni që nuk do të jetë e lehtë", paralajmëroi kancelarja, "dhe duhet ta trajtojmë këtë çështje me shumë ndjeshmëri".

Përpjekje për të zbutuar masat për të vaksinuarit

Kancelarja tha se qeveria gjermane po shqyrton mundësinë e zbutjes së masave për personat që janë vaksinuar plotësisht kundër COVID-19. Duke cituar një studim të Institutit zyrtar për Epidemiologjinë Robert Koch, Merkel tha se personat e vaksinuar plotësisht dhe ata që janë shëruar nga korona "nuk përbëjnë më rrezik të madh infeksioni".

Ajo tha se ata që i kanë marrë të dy dozat e vaksinës duhet të kenë mundësi të shkojnë tek berberi apo të hyjnë në dyqane pa pasur nevojë për të paraqitur një test negativ të virusit korona dhe të përjashtohen nga karantinimi pas ndonjë kontakti me një person të infektuar.

Ata që mund të provojnë se janë shëruar nga infektimi me virusin korona, për shembull me anën e një testi pozitiv PCR, jo më të vjetër se 28 ​​ditë, duhet të kenë gjithashtu të drejta të tilla, tha kancelarja.

Merkel nuk komentoi kur mund të hyjnë në fuqi zbutjet e kufizimeve, por tha se qeveria do të përgatisë një dekret me propozimet përkatëse, i cili më pas do të diskutohet në Bundestag.