Mursi: Nuk do t'ju zhgënjej

Pas ceremonisë së betimit të shtunën pasdite (30.06.) ishte ky veprimi i parë: një fjalim drejtuar kombit si president i zgjedhur i vendit. Vendi: Salla në Universitetin e Kairos para disa mijëra pjesëmarrësve. Përveç diplomatëve të shumtë, përfaqësuesëve të politikës, ushtrisë, fesë dhe shoqërisë civile të pranishëm ishin edhe pjestarët e familjeve të viktimave të kryengritjes kundër regjimit të Mubarakut. Fjalimi i pritur me padurim ishte shumë i shkurtër, ai zgjati vetëm 30 minuta dhe nuk ishte shumë konkret. Munguan sqarimet për mënyrën se si do të zgjidhen problemet nga Mursi si presidenti i parë civil i zgjedhur nga populli. Në vend të tyre, 60-vjeçari u paraqit me formulime të përgjithshme. "Institucionet e zgjedhura do të kthehen për të bërë punën e tyre dhe gjithashtu do të kthehet edhe ushtria e mrekullueshme egjiptiane për të përmbushur misionin e saj të vërtetë, për të garantuar sigurinë dhe për të mbrojtur kufijtë e vendit."

Mursi thurë lavdata për ushtrinë

Me "institucionet e zgjedhura", Mursi me sa duket e kishte fjalën për parlamentin i cili u shpërbë para ca kohësh dhe pritet të zgjidhet përsëri në fund të vitit. Kreu i ri i shtetit e lavdëroi pothuajse pa kursim rolin e ushtrisë në muajt e fundit. Ajo ka mbrojtur popullin egjiptian në këtë situatë të vështirë. Ai nuk e tha asnjë fjalë për faktin se ushtria së fundi ka shkurtuar kompetencat e tij si president. Ai e sheh veten në shërbim të popullit, theksoi Mursi dhe dëshiron që fuqinë e tij ta shpenzojë në shërbim të kombit: "Roli i presidentit në shtetin e ri egjiptian do të jetë në shërbim të popullit dhe kombit. Detyra ime e parë është që të jem një ndërmjetës në mes të gjitha institucioneve të shtetit dhe një ruajtës i Kushtetutës dhe sistemit ligjor."

Së bashku me të gjithë egjiptianët Mohammed Mursi dëshiron të ndërtojë një komb të mrekullueshëm, i cili përsëri do të luajë një rol të rëndësishëm në Lindjen e Mesme. Megjithatë, nuk do të lejohet asnjë përzierje në çështjet e brendshme të Egjiptit. Marrëveshjet ndërkombëtare, u shpreh kreu i ri i shtetit, do të respektohen edhe më tej: "Unë e përsëris edhe njëherë premtimin tim se ne do të respektojmë dhe do të përmbushim të gjitha marrëveshjet ndërkombëtare."

Mbështetje e hapur për popullin palestinez

"Unë e njoftoj këtu gjithashtu se populli egjiptian, kombi egjiptian dhe presidenti do të mbështesin popullin palestinez deri sa ai të rifitojë të gjitha të drejtat e tij legjitime. Unë do të punojë për të arritur pajtimin kombëtar palestinez, në mënyrë që palestinezët të jenë një popull i cili do të rkthejë vendin dhe sovranitetin e tij", u shpreh Mursi në fjalimin e tij.

Ndërkaq sa i përket politikës së brendshme, presidenti egjiptian premtoi se do të ketë një bashkëpunim në mes myslimanëve dhe të krishterëve. Përsëri, ai nuk ishte shumë konkret se si do të duket ky bashkëpunim. Për të drejtat e grave ai nuk tha asnjë fjalë. Paraqitjen e parë si president i vendit Mohammed Mursi e mbylli me këto fjalë: "Unë nuk do t'ju zhgënjej si president i Egjiptit."