Prishtina zyrtare kundër protokollit mes EULEX-it dhe Serbisë

Misioni i BE-së për policinë dhe drejtësinë EULEX, nuk keq dorë nga synimi që të bashkëpunojë me policinë e Serbisë për shkëmbimin e informacioneve. Ata e kanë zbutur paksa gjuhën e komunikimit me institucionet e Kosovës duke mos e quajtur më marrëveshjen që pritet ta nënshkruajnë me Serbinë por aranxhim teknik, që do të shërbejë për të mirën e qytetarëve të Kosovës. Ndryshimi i emrit protokoll në aranzhim teknik, u bë pas kundërshtimit të ashpër të Prishtinës zyrtare. Qeveria e kundërshtoi edhe kërkesën e BE-së, e cila kërkoi nga qeveria që ta mbështesë EULEX-in në nënshkrimin e protokollit me policinë e Serbisë.

EULEX: Jo protokoll por aranzhim teknik

Zyrtarë të misionit EULEX, thonë se ata tash do të nënshkruajnë, siç thonë, aranzhime teknike me Serbinë, të cilat dallojnë nga protokollet. Karin Limdal, zëdhënëse në EULEX-it, thotë se ky mision nuk ka ndërmend ta anashkalojnë Prishtinën zyrtare në lidhje me nënshkrimin e të ashtuquajturave aranzhime teknike me Serbinë. “Ne nuk po merremi me një protokoll, apo me një marrëveshje ndërkombëtare, apo me ndonjë gjë të ngjashme. Këto gjëra nënshkruhen vetëm ndërmjet shteteve dhe EULEX-i nuk është shtet. Ajo që ne përpiqemi të formalizojmë është një aranzhim teknik me Serbinë për shkëmbimin e informatave në fushën e policisë. Marrëveshje të ngjashme kemi nënshkruar në të kaluarën edhe me Maqedoninë, me Shqipërinë dhe me Malin e Zi”, thotë Karin Limdal.

Zëvëndëskryeministri i Kosovës, Hajredin Kuci, thotë se Prishtina zyrtare është kundër nënshkrimit të protokolleve ndërmjet EULEX dhe Serbisë, mirëpo, sipas tij akoma ka hapësirë për diskutime rreth kësaj çështjeje, por pa e dëmtuar interesin kombëtar të Kosovës.

“Unë kisha dashur që t' u japin hapësirë institucioneve dhe të tjerëve që të bëjnë zgjidhje më racionale për vendin dhe mos të kemi një po ose një jo të dikujt dhe pastaj të jemi peng të veprimeve të mëpastajme. Unë ju siguroj se asnjë qytetar i Kosovës nuk duhet të frikësohet se ne do të dëmtojmë raportet me BE-në dhe poashtu ju siguroj se nuk do të dëmtojmë interesin kombëtar”, thotë Kuci.

Eskpertë të marrëdhënieve ndërkombëtare: Ndryshimi i terminologjisë nga protokoll në aranzhim teknik vetëm lojë fjalësh

Driton Lajqi, analist thotë se thelbi i marrëveshjes Serbi-EULEX, për bashkëpunim policor është i njëjtë çfarëdo emetimi t'i japin dokumentit. “Ndryshimi i terminologjisë në këtë rast bëhët me qëllime politike diplomatike dhe në mënyrë që të kënaqen të gjitha palët. Kjo për faktin që secila palë në një farë mënyre ta ruajë autoritetin e vet. Ne të gjithë e dimë se Serbia nuk dëshiron të ketë marrëveshje as teknike dhe as politike me Kosovën, sepse nuk e njeh si shtet, prandaj mision EULEX ka gjetur një terminologji të butë por, që nuk e dëmton thebin e marrëveshjes për bashkëpunim policor me Serbinë”, thotë Driton Lajqi.

Sidoqoftë, megjithë debatet e nxehta ndërmjet Prishtinës zyrtare dhe misionit evropian EULEX, ky mision në fund të fundit do të bashkëpunojë me policinë e Serbisë, thonë analistë të pavarur. Bashkëpunim në shkëmbimin e informacioneve me policinë e Serbisë ka pasur edhe më parë misioni i Kombeve të Bashkuara, UNMIK, sepse funksiononte në bazë të rezolutës 1244 të Këshillit të Sigurimit. Mbi bazën e kësaj rezolute është vendosur në Kosovë edhe misioni i BE-së për polici dhe drejtësi EULEX.

Autor: Bekim Shehu

Redaktoi Vilma Filaj-Ballvora