Sulmi dhe zjarrvënia në një xhami në një fshat të banuar prej arabëve në pjesën veriore të Izraelit u prit me keqardhje dhe u dënua

Presidenti izraelit Peres tha përpara vizitës së tij në Tuba Zangariyah, vendi ku ndodhi sulmi zjarrvënës se kjo është një turp për shtetin e Izraelit: "Unë dua të shpreh se jam thellësisht i tronditur në lidhje me këtë incident vërtetë të tmerrshëm, për zjarrvënien në Tuba Zangariah. Është e papërfytyrueshme që një hebre dëmton vendet e shenjta të një feje tjetër. Ky veprim nuk është hebre, ai është i jashtëligjshëm dhe i pamoralshëm dhe na vjen thellësisht turp. " - tha Peres.

Presidenti Peres nuk është i vetmi që shprehu dyshimin se përgjegjës për dëmin e xhamisë  janë izraelitët radikalë. Në muret e xhamisë, autorët e krimit kishin shkruar "hakmarrje" dhe "Preisschild". Me fjalën "Preisschild" izraelitët quajnë aksione që ndërmarrin duke ushtruar dhunë kundër palestinezëve dhe institucioneve të tyre. Palestinezët duhet të paguajnë një çmim, kjo është logjika e tyre.

Kjo formë vandalizmi nuk është në Izrael dhe territoret e pushtuara prej Izraelit një rast i izoluar. Imami i Tuba Zangariyahut, Fuad Zangariah paralajmëron ndaj sulmeve të mëtejshme: "Unë mund të kem të gjitha llojet e problemeve me dikë, por të dëmtosh një vend ku bëhet fjalë për fenë - xhamitë, sinagogat, të gjitha këto - kjo u dhemb njerëzve dhe u jep atyre një ndjenjë të keqe."

Fshatarët dyshojnë se autorët janë nga mjedisi i tyre. Jamal Zangariyah është një nga banorët: "Në Safet në qarqe të caktuara të mbledhura rreth rabinit Eliyahu kërkohet një lloj racizmi kundër arabëve. Fjalët edhe mund të vrasin, dhe mendoj se ky lloj agjitacioni e çoi dikë që ishte i ngarkuar me këtë lloj racizmi kundër arabëve, fshati Tuba Zangariyye ishte një objektiv i lehtë."

Rabini Eliyahu, i cili tashmë ka folur një herë publikisht që të mos u jepen banesa me qira arabëve izraelitë, i hedh poshtë këto akuza.

Drejtuesja e opozitës Livni tha se pas veprimesh të tilla Izraeli duhet të reflektojë për qëndrimet e veta.

 

Autor: Torsten Teichmann / Pandeli Pani

Redaktoi: Esat Ahmeti