1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi Mkuu wa Ujerumani 2025Mzozo wa Israel na HamasBundesliga
Sauti zetuVidio zetu
Afya

Idadi ya maambukizi ya corona Kenya yaongezeka na kufika 122

Shisia Wasilwa, Nairobi3 Aprili 2020

Watu 12 wamegundulika kuwa na virusi hivyo vya corona nchini Kenya katika kipindi cha saa 24 zilizopita. Idadi ya waliokufa kutokana na virusi hivyo pia imeongezeka hadi wanne baada ya mtoto wa miaka sita kufariki.

https://p.dw.com/p/3aPd8
Uhuru Kenyatta na baadhi ya mawaziri akizungumzia mripuko wa corona nchini Kenya. (Picha ya maktaba)
Uhuru Kenyatta na baadhi ya mawaziri akizungumzia mripuko wa corona nchini Kenya. (Picha ya maktaba)Picha: PSCU

Mtoto wa miaka sita amefariki dunia kutokana na virusi vya corona nchini Kenya na kufikisha idadi ya watu walioaga dunia kutokana na ugonjwa huo kuwa wanne, huku watu walioambukizwa ugonjwa huo ikifikia 122. Hayo ni kwa mujibu wa wizara ya Afya. Wakati huo huo, taifa hilo la Afrika Mashariki limeanza kujitengenezea barakoa zake.

Katika kipindi cha saa 24 zilizopita watu 12 wamegundulika kuwa virusi hivyo vya corona nchini Kenya. Akizungumza na wanahabari waziri msaidizi katika wizara ya Afya Mercy Mwangangi amesema kati ya visa hivyo vipya vilivyotangazwa leo, watu 11 ni raia wa kenya na raia moja wa Somalia. Kati yao, wagonjwa wanane ni wa kiume huku wanne wakiwa wanawake. Watu walioambukizwa ugonjwa huo hadi kufikia sasa ni watu wenye umri wa miaka 28 hadi 68. Watu hao 12 wamewekwa kwenye karantini mbali mbali za taifa.

Hadi kufika sasa watu 1,433 wamewekwa kwenye karantini huku wengine 617 wakitarajiwa kutengwa. Wakati huo huo serikali imeanza kutengeneza barakao ambazo zitasambazwa kupitia kwa serikali za majimbo kwa bei nafuu.

Serikali ya Kenya imesema itawaajiri wahudumu wa afya 5000 zaidi katika siku chache zijazo kuimarisha vita dhidi ya corona
Serikali ya Kenya imesema itawaajiri wahudumu wa afya 5000 zaidi katika siku chache zijazo kuimarisha vita dhidi ya coronaPicha: Reuters/B. Ratner

Serikali imesema viwanda ambavyo vinatengeza barakao hizo vina uwezo wa kutengeza barakao milioni 60. Washonaji wa chereheni pia wataruhusiwa kutengeza barakao hizo. Alhamisi serikali ilitangaza visa vipya 29, idadi kubwa zaidi kuwahi kutangazwa tangu maradhi hayo yalipobisha hodi nchini. Betty Maina ni wziri wa biashara na Viwanda.

Ili kuimarisha vita dhidi ya ugonjwa huo serikali imetangaza kuwa itaawajiri Wahudumu 5000 wa afya katika kipindi cha siku saba zijazo katika majimbo yote 47. wataajiriwa kusaidia kukabiliana na maambukizi ya covid-19 katika majimbo. Wahudumu hao wanakabiliwa na hatari wanapowauguza wagonjwa suala ambalo Katibu wa Muungana wa vyama vya wauguzi nchini Seth Panyako anasema linastahili kuangaziwa na serikali.

Habari njema ni kuwa watu wanne wamethibitishwa kupona maradhi hayo ya covid-19, hivyo kutoa matumaini kwa wagonjwa wengine wanaougua ugonjwa huo.

Kwingineko naibu gavana wa jimbo la Kilifi Gidion Saburi amekamatwa siku tatu baada ya kupona virusi vya Corona. Saburi aliyeingia nchini kutoka Ujerumani, alikataa kujitenga na badala yake kutangamana na watu hivyo kuhataraisha maisha yao majuma matatu yaliyopita.