1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Sauti zetuVidio zetu
Yanayoangaziwa
Uchaguzi wa Marekani 2024Mzozo wa Israel na HamasBundesliga
SiasaAfrika

Kenya: maandamano yarejea tena kudai uwajibikaji

Thelma Mwadzaya16 Julai 2024

Maandamano ya amani yamerejea kote nchini Kenya kudai uwajibikaji na kuwakumbuka waliouawa katika wiki tatu za kupinga Mswada wa fedha wa 2024 uliotupiliwa mbali.

https://p.dw.com/p/4iMFk
Maandamano Nairobi
Hali katikati mwa jiji la Nairobi ni tete huku polisi wakitumia mabomu ya kutoa machozi kuwatawanya waandamanajiPicha: Daniel Irungu/EPA

Hali ni ya wasiwasi katikati ya jiji la Nairobi ambako maduka yamefungwa na idadi ya watu wanaotembea sio ya kawaida. Polisi wanapiga doria na baadhi ya barabara zimefungwa. Polisi wamefyatua makopo ya gesi ya kutoa machozi ili kuwatawanya waliokuwa wanakusanyika. Moshi ulihanikiza na baadhi wanaonekana wakiosha nyuso zao. Pikipiki kadhaa zimetelekezwa wakati wa mshike mshike huo.

Hofu ya vijana kutekwa wakati wa maandamano ya Kenya

Polisi waliojihami wanaonekana nje ya afisi muhimu za serikali kama Ikulu ya Nairobi, bunge la Taifa na mahakama ya juu. Dhamira ya maandamano ya leo ya amani ni kuishinikiza serikali kuwajibika ukizingatia mauaji ya wanaharakati pamoja na ambao hawajulikani waliko. Kufikia sasa serikali imekiri kuwa idadi ya waandamanaji waliopoteza maisha yao ni 25 , ila takwimu za shirika la kitaifa la kutetea haki za binadamu KNCHR, inaelezea mauaji ya watu 41 na majeruhi 360.

Soma pia: Baadhi ya vijana hawajaridhishwa na Ruto kulivunja baraza la mawaziri

Kwa upande wake, kaimu inspekta mkuu wa polisi Douglas Kanja amewatahadharisha waandamanaji kuwa wakora wanapanga kuwavuruga. Kaimu Inspekta mkuu huyo wa polisi wa Kenya amewarai waandamanaji kudumisha utulivu na kushirikiana na maafisa wa usalama.

Maandamano Kenya
Kaimu Ispekta Mkuu wa Polisi Douglas Kanja ameonya dhidi ya matukio yoyote ya uvunjifu wa sheriaPicha: Simon Maina/AFP/Getty Images

Saa chache zilizopita taarifa ya baraza la Makanisa limekashifu mauaji na kuelezea kuwa yanakiuka sheria. Askofu Antony Muheria ni wa kanisa la katoliki dayosisi ya Nyeri na anaamini ipo nafasi ya kufanya mabadiliko.

Haya yanajiri baada ya magunia ya maiti zisizopungua 8 kuopolewa timboni Kware mtaani Embakasi mwishoni mwa wiki iliyopita. Kwa sasa familia zimeombwa kujitokeza kutambua maiti hizo ambazo zinafanyiwa ukaguzi na upasuaji kwenye chumba cha hifadhi cha City. Mshukiwa mkuu amefikishwa mahakamani hii leo.

Maandamano Kisumu
Hali ya usalama pia imeimarishwa Kisumu ambako vijana wanatarajiwa kuandamanaPicha: James Keyi/REUTERS

Huko Kisumu, waandamanaji wanasisitiza kuwa Lengo ni kuishinikiza serikali kuu kuwajibika na wala sio kuhangaisha uongozi wa serikali ya kaunti. Itakumbukwa kuwa baraza jipya la mawaziri Linasubiriwa na wito umetolewa kuwapa nafasi wataalam.

Yote hayo yakiendelea, shirika la kutetea haki za binadamu la Human Rights Watch linaitolea wito shirika la fedha duniani, IMF, kufanya kazi kwa pamoja katika utekelezaji wa mpango wake wa kiuchumi na kutimiza haki za binadamu.

Soma pia: Kenya yashuka zaidi katika nchi zisizoweza kukopesheka

Ifahamike kuwa mswada wa fedha wa 2024 ukizingatia mpango huo wa IMF na Kenya, ulitarajia kukusanya dola bilioni 2.7 za Marekani za Pato la ziada katika mwaka mpya wa fedha ikiwa ni baadhi ya masharti ya IMF.