LONDON Maonyesho ya muziki yaandaliwa kuushinikiza ulimwengu kuuangamiza umaskini barani Afrika.

Mwanamuziki wa miondoko ya Rock mzaliwa wa Ireland, Bob Geldof, ametangaza mpango wake wa kufanya maonyesho ya muziki yanayolenga kuwashinikiza viongozi ulimwenguni kote kuungamiza umaskini barani Afrika.

Maonyesho hayo yanayojulikana kwa jina ´Live 8´ yanafuatia burudani nyengine za ´Live Aid´ ambazo Geldofr aliziandaa miaka 20 iliyopita kukusanya pesa kwa watu walioteseka kwa njaa nchini Ethiopia.

Maonyesho haya ya sasa yanatarajiwa kufanyika tarehe mbili mwezi Julai mjini London, Uingereza, Berlin Ujerumani, Paris, Ufaransa Roma, Itali na Philadelphia, Marekani. Yatafanyika mda mfupi kabla kufanyika mkutano wa mataifa yaliyoendelea zaidi kiviwanda duniani, G8 huko nchini Scotland.