1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi wa Marekani 2024Mzozo wa Israel na HamasBundesliga
Sauti zetuVidio zetu
MigogoroMashariki ya Kati

Watu 87 wauawa au kupotea Kaskazini mwa Gaza

Iddi Ssessanga
20 Oktoba 2024

Mashambulizi ya Israel kwenye nyumba kadhaa kaskazini mwa Ukanda wa Gaza usiku wa kuamkia Jumapili yamesababisha vifo au kupotea kwa watu wasiopungua 87, kwa mujibu wa Wizara ya Afya ya eneo hilo.

https://p.dw.com/p/4m0GO
Maeneo ya Palestina Ukanda wa Gaza | Israel yashambulia jengo katika kambi ya wakimbizi ya Al-Maghazi huko Deir al-Balah
Wapalestina wakifanya operesheni ya uokoaji na utafutaji wa watu waliokwama chini ya kifusi cha nyumba iliyoharibiwa baada ya shambulizi la Israel kwenye jengo la familia ya Shenaa, katika kambi ya wakimbizi ya Al-Maghazi huko Deir al-Balah, Gaza, mnamo Oktoba 19, 2024.Picha: Omar Ashtawy/APA Images/Zumapress/picture alliance

Mashambulizi ya Israel kwenye mji wa Beit Lahiya, kaskazini mwa Gaza, yamesababisha vifo au kupotea kwa watu 87, inasema Wizara ya Afya ya eneo hilo.

Watu wengine 40 wamejeruhiwa katika mashambulizi hayo, ambayo yalifanyika kwenye mji uliokuwa miongoni mwa malengo ya kwanza ya uvamizi wa ardhini wa Israel takriban mwaka mmoja uliopita.

Mashambulizi hayo yalifanyika huku Marekani ikichunguza uvujaji wa nyaraka za siri kuhusu mipango ya Israel kuishambulia Iran, kulingana na maafisa watatu wa Marekani. Afisa wa nne wa Marekani alisema nyaraka hizo zinaonekana kuwa halali.

Nyaraka hizo, ambazo zimeelezwa kutolewa na Shirika la Kijasusi la Marekani (Geospatial Intelligence Agency) na Shirika la Usalama wa Taifa (NSA), na zimewekwa alama kuwa siri kuu, zinaonyesha kwamba Israel ilikuwa inahamisha vifaa vya kijeshi tayari kufanya shambulizi la kijeshi kujibu shambulizi la kombora la Iran mnamo Oktoba 1.

Maeneo ya Palestina Ukanda wa Gaza | Israel yashambulia jengo katika kambi ya wakimbizi ya Al-Maghazi huko Deir al-Balah
Gaza Kaskazini ilikuwa eneo la kwanza lililolengwa na mashambulizi ya ardhini ya Israel baada ya Oktoba 7.Picha: Omar Ashtawy/APA Images/Zumapress/picture alliance

Maafisa wa Marekani walizungumza kwa masharti ya kutotajwa majina kwa sababu hawakuruhusiwa kujadili suala hilo hadharani.

Shinikizo la Marekani kwa Israel kusitisha vita

Marekani inaisihi Israel kushinikiza kusitisha mapigano huko Gaza kufuatia kuuawa kwa kiongozi wa Hamas, Yahya Sinwar, wiki iliyopita.

Soma pia: Kifo cha Sinwar kinamaanisha ni kwa Hamas, Gaza, Lebanon?

Hata hivyo, hakuna upande wowote, Israel wala Hamas, ambao umeonyesha nia mpya ya kufikia makubaliano hayo, baada ya miezi ya mazungumzo kugonga mwamba mwezi Agosti.

Iran inaiunga mkono Hamas na kundi la wanamgambo wa Hezbollah huko Lebanon, ambako mwaka mmoja wa mvutano ulizidi na kuwa vita kamili mwezi uliopita. Israel ilituma wanajeshi wa ardhini kwenda Lebanon mwanzoni mwa Oktoba.

Hakukuwa na tamko lolote mara moja kuhusu mashambulizi hayo ya Beit Lahiya kutoka kwa jeshi la Israel, ambalo limesema linaendelea na operesheni kote Gaza kwa mashambulizi ya anga na operesheni za ardhini.

Maombolezo ya marehemu baada ya shambulio kwenye kambi ya wakimbizi huko Jabalia kaskazini mwa Ukanda wa Gaza.
Waombolezaji wakihudhuria mazishi ya mtoto wa miaka kumi, Sama al-Debs, aliyeuawa wakati wa operesheni ya jeshi la Israel katika kambi ya wakimbizi ya Jabalia katikati mwa Ukanda wa Gaza mnamo Oktoba 18, 2024.Picha: Omar Al-Qattaa/AFP

Miongoni mwa waliouawa ni wazazi wawili na watoto wao wanne, pamoja na mwanamke, mwanawe, mkwe wake na watoto wao wanne, kwa mujibu wa Raheem Kheder, muokoaji wa huduma za dharura.

Alisema shambulizi hilo liliporomosha jengo lenye ghorofa kadhaa na nyumba nyingine nne jirani.

Mounir al-Bursh, mkurugenzi mkuu wa Wizara ya Afya, alisema wingi wa majeruhi kutokana na mashambulizi hayo umeongeza "hali mbaya zaidi" kwa mfumo wa huduma za afya kaskazini mwa Gaza, katika chapisho lake kwenye mtandao wa X (zamani Twitter).

Soma pia: Hezbollah yavurumisha makombora na kuua askari 4 wa Israel

Huduma ya intaneti ilikatika kaskazini mwa Gaza Jumamosi usiku na haikuwa imerejea tena kufikia mchana wa Jumapili, jambo lililofanya iwe vigumu kupata habari zaidi kuhusu mashambulizi hayo.

Uharibifu wa Gaza Kaskazini

Israel imekuwa ikitekeleza operesheni kubwa katika kambi ya wakimbizi ya Jabaliya, pia kaskazini mwa Gaza, kwa wiki mbili zilizopita. Jeshi linasema lilianzisha operesheni hiyo dhidi ya wapiganaji wa Hamas waliokuwa wakijikusanya tena eneo hilo.

Mapacha vichanga wauwawa Gaza

Gaza Kaskazini tayari imeathirika zaidi na uharibifu mkubwa wa vita hivi, na eneo hilo limezungukwa na vikosi vya Israel tangu mwishoni mwa mwaka jana, kufuatia shambulio la Hamas dhidi ya Israel.

Israel iliamuru watu wote walioko katika sehemu ya kaskazini ya Gaza, ikijumuisha Jiji la Gaza, kuhama kuelekea kusini katika wiki za mwanzo za vita, na ilirudia maagizo hayo mapema mwezi huu.

Ingawa idadi kubwa ya watu walikimbia mwaka jana, inakadiriwa kuwa takriban watu 400,000 wamebaki kaskazini. Wapalestina waliokimbia kaskazini mwanzoni mwa vita hawajaruhusiwa kurudi.

Soma pia: Mawaziri wa EU wagawika kuhusu mzozo wa Mashariki ya Kati

Mnamo Oktoba 7, 2023, wapiganaji wanaoongozwa na Hamas walibomoa uzio wa usalama wa Israel na kuvamia, wakiua takriban watu 1,200, wengi wao wakiwa raia, na kuwateka nyara wengine 250.

Mashambulizi ya Israel huko Gaza yamesababisha vifo vya zaidi ya Wapalestina 42,000, kwa mujibu wa mamlaka za afya za eneo hilo, ambazo hazitofautishi kati ya wapiganaji na raia.

Vita hivyo vimeharibu maeneo makubwa ya Gaza na kupelekea kuhama kwa takriban asilimia 90 ya watu wake wapatao milioni 2.3.

Chanzo: Mashirika