اسانج کی تحویل: برطانیہ اور ایکواڈور میں ’ٹھَن گئی‘

ایکواڈور کے وزیر خارجہ ریکارڈو پاٹینو نے بدھ کو ایک نیوز کانفرنس کے دوران برطانوی حکومت کی مذمت کرتے ہوئے اس بات کا انکشاف کیا کہ لندن حکام نے کیٹو کو ایک خط بھیجا ہے، جس میں دعویٰ کیا گیا ہے کہ پولیس کو سفارت خانے میں گھس کر اسانج کو گرفتار کرنے کا قانونی حق حاصل ہے۔

پاٹینو نے کہا: ’’ایکواڈور جولیان اسانج کو ان کے حوالے نہیں کرتا تو وہ ہمارے سفارت خانے پر چڑھائی کر سکتے ہیں۔‘‘

وزیر خارجہ کا مزید کہنا تھا: ’’برطانوی حکومت نے جو رویہ اپنایا ہے، وہ ناقابلِ قبول ہے، سیاسی لحاظ سے بھی اور قانونی تناظر میں بھی۔‘‘

انہوں نے خبردار کیا کہ بلااجازت سفارت خانے میں داخل ہونے سے سفارتی تعلقات پر ویانا کنونشن کے قوانین کی خلاف ورزی ہو گی۔

پاٹینو نے بتایا کہ ایکواڈور حکومت نے سیاسی پناہ کے لیے جولیان اسانج کی درخواست پر فیصلہ کر لیا ہے اور اس کا اعلان جمعرات کی صبح سات بجے (عالمی وقت کے مطابق دِن بارہ بجے) کیا جائے گا۔

اُدھر برطانوی حکام نے کہا ہے کہ وہ جولیان اسانج کو سویڈن کے حوالے کرنے کے لیے ’پرعزم‘ ہیں تاکہ وہاں وہ جنسی زیادتی کے الزامات کا سامنا کریں۔

برطانوی دفتر خارجہ کے ایک ترجمان کا کہنا ہے: ’’اسانج کو سویڈن کے حوالے کرنا برطانیہ کی قانونی ذمہ داری ہے تاکہ وہاں جنسی زیادتی کے الزامات پر ان سے پوچھ گچھ کی جا سکے اور ہم اپنی یہ ذمہ داری پورے کرنے کے ارادے پر اٹل ہیں۔‘‘

قبل ازیں منگل کو ایکواڈور کے صدر رافائل کورئیا نے اسانج کو سیاسی پناہ دینے کے بارے میں برطانوی ذرائع ابلاغ کی رپورٹ مسترد کر دی تھی۔ ان کا کہنا تھا کہ یہ افواہ غلط ہے اور اس سلسلے میں ابھی تک کوئی فیصلہ نہیں کیا گیا۔

انہوں نے یہ وضاحت سماجی رابطے کی ویب سائٹ ٹوئٹر پر ایک پیغام میں کی تھی۔ اکتالیس سالہ جولیان اسانج برطانیہ بدری سے بچنے کے لیے ایکواڈور میں پناہ چاہتے ہیں۔ انہیں سویڈن کے حوالے کیا جا سکتا ہے جہاں انہیں جنسی حملے کے الزامات کا سامنا ہے۔

وکی لیکس کے بانی کو خدشہ ہے کہ سویڈن سے انہیں امریکا کے حوالے کیا جا سکتا ہے جہاں ان پر امریکی خفیہ دستاویزات اپنی ویب سائٹ پر شائع کرنے پر جاسوسی کا مقدمہ چل سکتا ہے۔

(ng/ah (AFP, AP