اطالوی سیاحتی شہر وینس: سیلاب کی لپیٹ میں

اطالوی شہر وینس مجموعی طور پر ایک سو اٹھارہ جزیروں پر مشتمل ایک شہر ہے۔ یہ جزیرے نہری نظام سے جڑے ہیں۔ ان نہروں میں چلنے والے گنڈولے (کشتی کے ذریعے نقل و حرکت) مقامی آبادی سے زیادہ سیاحوں کو من پسند ہیں۔

وینس بحیرہ ایڈریاٹک میں واقع ہے۔ اس شہر کی نہروں میں اسی سمندر کا پانی پھرتا ہے۔ مقامی آبادی کا کہنا ہے کہ ماحولیاتی تبدیلیوں کی وجہ سے شہر میں پانی کی سطح غیرمعمولی طور پر بلند ہو گئی ہے۔

وینس شہر میں گزشتہ پچاس برسوں کے بعد ایسی سیلابی صورت حال پیدا ہوئی ہے۔ گنڈولے فی الحال چلنے بند ہو گئے ہیں۔ لوگ پانی میں سے گزر کر ضروریاتِ زندگی خریدنے پر مجبور ہیں۔ اٹلی کی حکومت نے شہر میں ایمرجنسی کا نفاذ کر دیا ہے۔

وینس کی نہروں میں پیدا ہونے والی طغیانی سے انتہائی بلند لہریں بھی اٹھ رہی ہیں۔ کئی لہریں پانچ فٹ تک بھی بلند ہوئی ہیں۔ پانی گھروں، دوکانوں اور مارکیٹوں میں داخل ہو چکا ہے۔ اس صورت حال کے سامنے شہری انتظامیہ ابھی تک بے بس دکھائی دیتی ہے۔

شدید طغیانی کی وجہ سے تعلیمی اداروں کو بند کرنے کے ساتھ ساتھ عام دفاتر تک لوگوں کا پہنچنا مشکل ہو گیا ہے۔ سیلاب کی وجہ سے سیاحوں کی بھیڑ کے مقامات مثلاً ڈوگیزے محل اور سینٹ مارکس برج بھی پانی کی لپیٹ میں ہیں۔

سیلابی صورت حال کی وجہ سے ابھی تک کوئی جانی نقصان تو نہیں ہوا لیکن مالی نقصان کا اندازہ بہت زیادہ لگایا گیا ہے۔ سیاحتی صنعت مفلوج ہو گئی ہے۔ کاروباری سرگرمیاں معطل ہیں۔ تاریخی ورثہ پانی کی لہروں سے شدید متاثر ہو رہا ہے۔

اطالوی حکومت نے وینس میں سیلاب سے پیدا شدہ صورت حال سے نمٹنے اور بحالی کے لیے بائیس ملین ڈالر کے خصوصی امدادی پیکج کی منظوری دی ہے۔ عام شہریوں کو پانچ ہزار یورو کی امداد اور کاروبار میں نقصان اٹھانے والے بیس ہزار یورو تک کا کلیم کر سکیں گے۔

اطالوی شہر وینس میں سیلاب کی وجہ شمالی اٹلی میں ہونے والی شدید بارشوں کو قرار دیا گیا ہے۔ قبل ازیں ایسا ہی سیلاب سن 1966 میں دیکھا گیا تھا۔ عام لوگوں نے اس پریشان کن صورت حال کو انتہائی تشویشناک قرار دیا ہے۔