افغان بچے کو لیونل میسی کی شرٹیں مل گئیں

ارجنٹائن کے فٹ بال اسٹار لیونل میسی نے اپنے مداح بچے مرتضیٰ احمدی کو ایک نہیں بلکہ دو شرٹیں تحفے کے طور پر دی ہیں اور ان پر میسی کے دستخظ بھی موجود ہیں۔ میسی کی طرف سے یہ تحفہ یونیسیف کے ذریعے افغانستان بھیجا گیا تھا جبکہ مرتضیٰ احمد اور ان کا خاندان صوبہ غزنی سے خصوصی طور پر اسے وصول کرنے کے لیے کابل گئے۔

افغانستان میں یونیسیف کے ترجمان ڈینس جانسن کا نیوز ایجنسی اے ایف پی سے گفتگو کرتے ہوئے کہنا تھا، ’’اس موقع پر مرتضیٰ کی مسکراہٹ ختم ہونے کا نام ہی نہیں لے رہی تھی۔ وہ بار بار کہہ رہا تھا۔ میں میسی سے محبت کرتا ہوں۔‘‘

میسی کی طرف سے ان دونوں شرٹوں پر ہسپانوی زبان میں ’’محبت کے ساتھ‘‘ لکھا ہوا ہے۔ بتایا گیا ہے کہ مرتضیٰ کے ’خزانے‘ میں ایک فٹبال کا اضافہ بھی کیا گیا ہے۔

افغانستان کا پانچ سالہ مرتضیٰ احمدی لیونل میسی کا پرستار تو ہے لیکن ہزارہ کمیونٹی کے غریب خاندان سے تعلق رکھنے والے اس بچے کے اہل خانہ میسی کی شرٹ خریدنے کی سکت نہیں رکھتے تھے۔ ایک ماہ پہلے پلاسٹک بیگ سے بنی شرٹ پہنے مرتضیٰ احمدی کی چند تصاویر نے دنیا بھر کے سوشل میڈیا پر دھوم مچا دی تھی۔ ان تصاویر میں مرتضیٰ نے سفید اور نیلی دھاریوں والا پلاسٹک تھیلا، جس پر میسی لکھا ہوا تھا ، پہنا ہوا تھا۔ مرتضیٰ کے پندرہ سالہ بھائی ہمایوں نے اپنے چھوٹے بھائی کو پلاسٹک کے تھیلے کی یہ جرسی پہنا کر اپنے بھائی کی تصویریں فیس بک پر شائع کر دی تھیں۔

اس کے بعد دنیا بھر کے سوشل میڈیا پر فٹبال کے شائقین نے مرتضیٰ کو ’’چھوٹا میسی‘‘ کہنا شروع کر دیا تھا۔ قبل ازیں افغان فٹ بال فیڈریشن نے کہا تھا کہ میسی کا ہسپانوی سفارتخانے کے ذریعے ان سے رابطہ ہوا ہے اور وہ مرتضیٰ احمد سے ملنے کی خواہش رکھتے ہیں۔ تاہم میسی کے ایک قریبی ذریعے نے اس خبر کی نہ تو تصدیق کی تھی اور نہ ہی تردید۔ نیوز ایجنسی اے ایف پی کے مطابق افغانستان میں سکیورٹی کی صورتحال شاید اس ملاقات میں رکاوٹ تھی۔

قبل ازیں مرتضیٰ کے والد جو غزنی میں ایک غریب کسان ہیں، نے کہا تھا کہ وہ اپنے بیٹے کو میسی کی نئی جرسی دلانے کی سکت نہیں رکھتے اور ان کے بیٹے کے پاس ایک پنکچر شدہ فٹ بال ہے۔