القادر ٹرسٹ کیس سے عمران خان اور ملک ریاض کا کیا تعلق ہے؟

عمران خان کی منگل کو مبینہ بدعنوانی کے الزام میں گرفتاری کے بعد سے خبروں اور سوشل میڈیا پوسٹوں میں مسلسل  القادر ٹرسٹ کا نام  لیا جا رہا ہے۔ نیب کا کہنا ہے کہ اس نے سابق وزیر اعظم کو اسی القادر ٹرسٹ سے متلعق مالی بدعنوانی کی تحقیقات کے سلسلے میں زیر حراست لیا ہے۔

حکام کا کہنا ہے کہ عمران خان اور ان کی اہلیہ بشری بی بی نے ایک خیراتی ٹرسٹ کے نام پر پراپرٹی ٹائیکون ملک ریاض سے بطور رشوت یہ زمین حاصل کی۔ عمران خان اور ان کے حامیوں نے کوئی بھی غلط کام کرنے سے انکار کیا ہے۔

ذیل میں القادر ٹرسٹ اور اس سے جڑی زمین کے حصول کے بارے میں کچھ حقائق بیان کیے گئے ہیں۔

القادر ٹرسٹ کیا ہے؟

القادر ٹرسٹ ایک غیر سرکاری فلاحی تنظیم ہے، جسے عمران خان نے اپنی موجودہ اور تیسری اہلیہ بشریٰ وٹوکے ساتھ مل کر سن 2018 میں قائم کیا تھا۔ عمران خان اس وقت ملک کے وزیر اعظم تھے۔ انہوں نے بطور وزیر اعظم  سرکاری تقریبات میں اس ٹرسٹ کا ذکر کیا اور اسے فروغ دینے کی کوشش کی۔ وفاقی وزیر قانون اعظم نذیر تارڑ کے مطابق عمران خان اور ان کی اہلیہ ہی صرف اس ٹرسٹ کے تنہا  ٹرسٹی ہیں۔

عمران خان کی گرفتاری کے پاکستانی سیاست پر ممکنہ اثرات

ٹرسٹ کیا کرتا ہے؟

یہ ٹرسٹ اسلام آباد کے مضافات میں روحانیت اور اسلامی تعلیمات کے لیے وقف ایک یونیورسٹی چلاتا ہے۔ یہ منصوبہ سابق خاتون اول، جنہیں عام طور پر بشریٰ بی بی کے نام سے بھی جانا جاتا ہے اور وہ ایک روحانی معالج کے طور پر شہرت رکھتی ہیں، کی کاوش ہے۔ عمران خان  عوامی طور پر انہیں اپنی روحانی پیشوا کے طور پر متعارف کراتے ہیں اور کہتے ہیں کہ ان کی اہلیہ  نے روحانیت کی راہ پر ان کی مدد کی۔

کرپشن کیس کیا ہے؟

وزیر داخلہ رانا ثناء اللہ نے منگل کو ایک پریس کانفرنس میں بتایا کہ یہ ٹرسٹ عمران خان کے لیے ایک ریئل اسٹیٹ ڈویلپر ملک ریاض حسین سے رشوت کے طور پر قیمتی زمین حاصل کرنے کا ایک ذریعہ تھا۔ نجی ہاؤسنگ اسکیم بحریہ ٹاؤن کے مالک ملک ریاض حسین کا شمار پاکستان کے سب سے امیر اور طاقتور ترین کاروباری افراد  ہوتا ہے۔

 وزیر  داخلہ کے مطابق القادر ٹرسٹ کے پاس تقریباً 60 ایکڑ زمین ہے، جس کی مالیت سات ارب پاکستانی روپے (24.7 ملین ڈالر) ہے۔ اس کے علاوہ ٹرسٹ کے نام پر اسلام آباد میں عمران خان کی بنی گالہ میں ایک پہاڑی پر واقع رہائش گاہ کے قریب زمین کا ایک اور بڑا ٹکڑا بھی ہے۔ اسے یونیورسٹی کے لیے باضابطہ جگہ قرار دیا جاتا ہے لیکن وہاں بہت کم تعمیرات کی گئی ہیں۔

رشوت کا الزام کیسے لگایا گیا؟

حکومت کا کہنا ہے کہ اس معاملے کا تعلق 190 ملین پاؤنڈ کی اس  رقم سے ہے، جو برطانیہ نے 2019 میں ملک ریاض سے منی لانڈرنگ کے الزام میں برآمد کر کے پاکستان واپس بھجوائی تھی۔ اس رقم کو  پاکستان کے قومی خزانے میں ڈالنے کے بجائے عمران خان کی حکومت نے یہ رقم سپریم کورٹ کے اس کھاتے میں جمع کرانے کی منظوری دی، جہاں عدالت نے ملک ریاض کو بحریہ ٹاؤن کراچی کی اسکیم کے لیے زمینوں کی خریداری میں ہیرا پھیری پر چار ارب روپے سے زائد کا جرمانہ جمع کرانے کا حکم دے رکھا تھا۔

اس مقدمے میں ملک ریاض پر کراچی میں اپنی نجی ہاؤسنگ اسکیم  کے لیے مارکیٹ سے کم قیمت پر سرکاری زمینوں کے غیر قانونی حصول کا الزام تھا۔ وزیر داخلہ رانا ثناء اللہ نے الزام لگایا کہ ملک ریاض  نے اس احسان کے بدلے القادر ٹرسٹ کے ذریعے خان کو زمین دی۔

خان نے الزامات کا کیا جواب دیا؟

عمران خان کےحامی پہلے ہی کہہ چکے ہیں کہ یہ زمین اس ٹرسٹ کو خیراتی مقاصد کے لیے عطیہ کی گئی تھی۔ پی ٹی آئی کے رہنما فواد چوہدری نے منگل کو کہا کہ یہ الزامات من گھڑت ہیں۔ دوسری جانب ملک ریاض نے بھی کسی غلط کام کی تردید کی ہے۔

ش ر ⁄ ع ت (روئٹرز)