ايرانی صدر کا اولين دورہ، سلامتی اہم موضوع

ایرانی صدرمسعود پزشکیان بدھ گيارہ ستمبر کو عراق کا دورہ کريں گے، جو جولائی ميں منصب سنبھالنے کے بعد ان کا اولين غير ملکی دورہ ہو گا۔ ايرانی سرکاری ميڈيا نے اتوار کو اس دورے کی تصديق کرتے ہوئے لکھا کہ صدر پزشکیان ايک وفد کے ساتھ عراق جا رہے ہيں، جس ميں متعدد اعلٰی اہلکار شامل ہوں گے۔ ايرانی وفد کے ارکان سينئر عراقی اہلکاروں سے بات چيت کريں گے۔

ایران میں سنی سیاست دان اہم حکومتی عہدے کے لیے منتخب

ایران کو سو بلین ڈالر سے زائد کی بیرونی سرمایہ کاری درکار، صدر پزشکیان

ایرانی پارلیمان نے نئی کابینہ کے تمام ناموں کی منظوری دے دی

ايران کی سرکاری نيوز ايجنسی ارنا نے بغداد کے ليے ايرانی سفير محمد کاظم الصادق کے حوالے سے لکھا ہے کہ پزشکیان يہ دورہ عراقی وزير اعظم شيعہ السوڈانی کی درخواست پر کر رہے ہيں۔ دونوں ممالک کے مابين سکيورٹی اور ديگر امور پر مفاہمت کی يادداشت پر دستخط ہونا ہيں، تاہم اس بارے ميں مزيد تفصيل نہيں بتائی گئی۔ الصادق کے بقول ان معاہدوں پر در اصل ايک حادثے ميں جان بحق ہو جانے والے سابق ايرانی صدر ابراہيم رئيسی نے دستخط کرنے تھے تاہم ان کے انتقال کے بعد يہ معاملہ تاخير کا شکار ہو گيا۔

جولائی ميں دفتر سنبھالنے کے بعد مسعود پزشکیان نے واضح طور پر يہ کہا تھا کہ وہ علاقائی سطح پر پڑوسی ملکوں کے ساتھ دو طرفہ تعلقات کو بہتر بنانے کے ليے کوشاں ہيں۔ ايران اور عراق، مشرق وسطیٰ کے دو شيعہ ممالک کے مابين پچھلی دو دہائيوں ميں تعلقات بہتر ہوئے ہيں۔

تہران اور بغداد اہم تجارتی پارٹنر ممالک بھی ہيں۔ يہ امر بھی اہم ہے کہ تہران حکومت کا بغداد حکومت پر بھی خاصہ اثر و رسوخ ہے اور عام خيال يہی ہے کہ وہ عراقی سياست پر بھی اثر انداز ہوتی ہے۔

پچھلے سال مارچ ميں دونوں ملکوں نے مشترکہ سرحد کے حوالے سے ايک سکيورٹی معاہدے کو حتمی شکل دی، جس کے تحت ايرانی کرد باغی گروپوں کو سرحدی علاقوں ميں ہتھيار پھينکنے پر رضامند کيا گيا۔ ايران ان گروپوں پر الزام لگاتا ہے کہ سن 2022 ميں ايرانی کرد مہسا امينی کی متنازعہ حالات ميں ہلاکت کے بعد شروع ہونے والے احتجاجی سلسلے کو اس گروپ نے طول دی اور ہتھيار فراہم کيے۔

ع س/ا ب ا (اے ایف پی)