ایران کے خلاف عالمی اتحاد کے لیے کوشاں ہیں، پومپیو

امریکا کے وزیر خارجہ مائیک پومپیو نے کہا ہے کہ وہ مشرق وسطیٰ کے اپنے دورے کے دوران ایران کے خلاف عالمی اتحاد قائم کرنے کی کوششیں کریں گے۔ پومپیو اس دورے میں سعودی عرب اور متحدہ عرب امارات جائیں گے۔ سعودی عرب روانگی سے قبل امریکی وزیر خارجہ نے واضح کیا کہ وہ مختلف ممالک سے رابطے رکھے ہوئے ہیں تا کہ اسٹریٹیجیک بنیاد پر ايران کے خلاف ایک عالمی اتحاد کا قیام ممکن ہو سکے۔

پومپیو کے مطابق سعودی عرب اور مشرق وسطیٰ کے دورے کے مقاصد میں اُن کوششوں کو تقویت دینی ہے تا کہ ایران مختلف ملکوں میں دہشت گردی کی حمایت کو ختم کر دے، جوہری ہتھیار سازی کے اپنے ممکنہ منصوبے سے کنارہ کش ہو جائے اور بیلسٹک میزائل سازی سے بھی اجتناب کا فیصلہ کرے۔ امریکی وزیر خارجہ نے اپنے صدر کے ایران کے ساتھ مذاکرات کرنے کی خواہش کو بھی دہرایا۔

اس کا قوی امکان ہے کہ سعودی عرب میں قیام کے دوران اعلیٰ سطحی ملاقاتوں میں شرکت کے ساتھ ساتھ وہ اپنے سعودی ہم منصب ابراہیم بن عبدالعزیز سے بھی ملاقات کریں گے۔ وہ اس دورے کے دوران سعودی ولی عہد پرنس محمد بن سلمان سے بھی ملاقات کا ارادہ رکھتے ہیں۔

امریکا اور ایران کے درمیان کشیدگی اور تناؤ میں اُس وقت سے اضافہ ہو رہا ہے، جب امریکی صدر نے ایرانی جوہری ڈیل سے علیحدگی اختیار کی تھی۔ امریکا اس مناسبت سے ایران کے ساتھ نئے مذاکرات شروع کرنا چاہتا ہے۔ اس مقصد کے لیے وہ سن 2015 میں طے پانے والی ڈیل سے علیحدگی کے بعد سے ایران پر اقتصادی پابندیوں کے نفاذ کا سلسلہ جاری رکھے ہوئے ہے۔ رواں ہفتے کے دوران امریکا کی جانب سے ایران پر نئی پابندیاں عائد کرنے کا بھی اعلان کیا جا چکا ہے۔

امریکی وزیر خارجہ اسی دورے کے دوران منگل کو بھارت بھی جائیں گے۔ ان دوروں کے بعد وہ جی ٹوئنٹی سمٹ میں اپنے صدر ڈونلڈ ٹرمپ کے وفد میں شامل ہو جائیں گے۔ امریکی صدر ٹرمپ جاپان کے علاوہ جنوبی کوریا کا بھی دورہ کریں گے۔

لوئیسا رائٹ (عابد حسین)