ایسٹر پر عالمی امن کے لئے دعائیں

جرمنی کے مختلف شہروں میں جنگ و جارحیت کے خلاف اور دنیا کو ایٹمی ہتھیاروں سے پاک کرنے کے حق میں مظا ہروں کا انعقاد بھی ہوا۔

پاپائے روم نے ویٹیکن سٹی کے مشہور زمانہ سینٹ پیٹرز اسکوائر میں جمع ہونے والے ہزاروں عیسائی زائرین کو ایسٹر کی مبارکباد پیش کی۔

عیسائی عقیدے کے مطابق حضرت عیسیٰ کے مصلوب ہونے کے بعد آج کے دن وہ دوبارہ زندہ ہوئے تھے۔ اس دن یعنی ایسٹر منڈے کو عیسائی یہ جشن مناتے ہیں۔ اس موقع پر پاپائے روم نے دنیا کے تمام انسانوں کے لئے امن و سکون اور خوشحالی کی دعا کی۔ ساتھ ہی انھوں نے حال ہی میں اطالوی شہر لا کیولا میں آنے والے بھیانک زلزلے کے متاثرین کے ساتھ دلی ہمدردی کا اظہار بھی کیا۔ پاپائے روم نے گھر بار سے محروم ہو جانے والے زلزلہ زدگان کے لئے لا کیولا میں قائم کیے جانے والے عارضی خیموں میں بچوں کے لئے چوکلیٹس بھیجیں۔ اطالوی وزیر اعظم سیلویؤ برلسکونی بھی اس تقریب میں موجود تھے۔

جرمنی کے مختلف شہروں میں ایسٹر جلوس نکالے گئے اور خصوصی اجتماعی دعائیں کی گئیں۔

جرمن صوبے سیکسنی کے پروٹسٹنٹ چرچ کے بشپ یوخن بوہل نے شہر لائپزگ اور ڈریسڈن منعقدہ ایسٹر کی تقاریب کے موقع پر امریکی صدر باراک اوباما کی دنیا کو اسلحے سے پاک کرنے کی نئی پیش قدمی کا خیر مقدم کیا۔ جرمن دارلحکومت برلن سمیت شہر کولون اور دیگر مقامات میں ایسٹر کے جلوس میں بڑی تعداد میں لوگوں نے شرکت کی۔

جرمن عوام نے بھی دنیا بھر سے ایٹمی ہتھیاروں کے خاتمے کی اپیل کی۔ ایک شہری نے کہا: ’’وفاقی جمہوریہ جرمنی میں اب بھی جوہری ہتھیار پائے جاتے ہیں اور ہم اس کے سخت خلاف ہیں۔‘‘

ایک اور جرمن باشندے نے کہا: ’’ہم چاہتے ہیں کہ یہ دنیا پر امن ہو اور ہر ملک انصاف اور برابری کی بنیاد پر دوسرے ملکوں کے ساتھ اپنے تعلقات استوار کرے۔ دنیا سے تشدد اور طاقت کے مظاہرے کا خاتمہ ہوجانا چاہئے۔‘‘

دریں اثناء ایران نے امریکہ اور دیگر ممالک کے ساتھ ایٹمی مذاکرات کی پیشکش کا خیر مقدم کیا ہے۔

تہران کے جوہری امور کے مذاکرات کار سعید جلالی نے یورپی یونین کے خارجہ پالیسی کے چیف خاوئیر سولانا کے ساتھ ٹیلی فون پر بات چیت میں کہا کہ ایٹمی مذاکرات کو تعمیری اور باہمی تعاون کی بنیادوں پر عمل میں لایا جانا چاہئے۔