بحر ہند پر اجارہ داری، بھارت اور چین کی مخفی جدوجہد

چینی صدر شی جِن پِنگ کے بھارتی دورے کے دوران اگر ایک جانب وہ نریندر مودی کی سالگرہ کے موقع پر ہونے والے پرائیویٹ عیشائیے میں اُن کے لیے نیک تمناؤں کا اظہار کر رہے تھے تو دوسری جانب ایک ہزار چینی فوجیوں کی بھارت کے سرحدی علاقہ مشرقی لداخ میں واقع چومار میں پانچ کلومیٹر تک اندر داخل ہونے کی خبر نے مجموعی صورت حال کو بظاہر پیچیدہ بنا دیا تھا۔ بھارتی تجزیہ کاروں کے مطابق ریاست گجرات میں دریائے صبراماتی کے کنارے پر نہرو جیکٹ زیب تن کیے شی جِن پِنگ اور نریندر مودی کی سنجیدہ گفتگو بھی دنوں ملکوں کی عسکری مقابلے بازی میں کمی لانے سے قاصر دکھائی دیتی ہے۔

چینی صدر کے بھارتی دورے کے دوران بحرہند کے بارے میں بھارتی خدشات قطعاً سامنے نہیں آئے۔ بحرِ ہند میں چینی سرگرمیوں پر بھارت گہری تشویش رکھتا ہے۔ تجزیہ کاروں کے خیال میں بحرہند بارے بھارتی تشویش غالباً چین کے اربوں ڈالر کے معاہدے تلے دب کر رہ گئی ہے۔ دوسری جانب چین کی جانب سے بحیرہ جنوبی چین اور بحیرہ مشرقی چین میں بحری سرگرمیوں میں اضافے نے علاقائی تشویش میں اضافہ کر دیا ہے۔ بحر ہند پر چین اور بھارت کی خاموش سرگرمیوں کا امریکا اور جاپان مسلسل جائزہ لے رہے ہیں۔

بحرہند سے گزرنے والے بحری جہازوں کے اعدادوشمار کے مطابق چین کے لیے 80 فیصد ٹینکر اور کارگو بحری جہاز گزرتے ہیں جبکہ بھارت کے لیے ایسے ہی بحری جہازوں کی شرح 65 اور جاپان کے لیے 60 فیصد ہے۔ خیال کیا جاتا ہے کہ اگر بحرہند میں کوئی کشیدگی جنم لیتی ہے تو براعظم ایشیا کے تین بڑے اقتصادی ملکوں کی معیشت کو سنگین خطرات لاحق ہو جائیں گے۔ چین بحر ہند میں میانمار سے لے کر پاکستان تک بندرگاہوں کی تعمیر و ترقی میں عملی طور پر شریک ہے۔

بھارتی سفارتکار کنول سیبل کے مطابق بھارت کے لیے اربوں ڈالر کے پُرکشش مالی سمجھوتے حقیقت میں ٹروجن کے گھوڑے کی مانند ہے اور اِس کی آڑ میں بیجنگ حکومت اپنی سمندری اجارہ داری کا عمل جاری رکھنے کی کوشش کرے گا۔ سابق بھارتی سفارتکار کنول سیبل کا کہنا ہے کہ چین ہر ممکن طریقے سے بحر ہند میں فعال کردار کا متمنی ہے اور اسی باعث وہ کئی ملکوں کے ساتھ گہرے سفارتی عمل کو جاری رکھے ہوئے ہے۔

چینی صدر کے سمندری سِلک رُوٹ کی بازگشت بھارت کے سفارتی و عسکری حلقوں میں سنائی دے رہی ہے۔ چین اپنے صدر کے اِس سِلک رُوٹ کے تصور تلے انٹرنیشنل تعاون کا سلسلہ بھی جاری رکھے ہوئے ہے۔ بھارت کے دورے سے قبل مالدیپ اور سری لنکا کے دورے بھی اسی انٹرنیشنل کوآپریشن کا حصہ خیال کیے جا رہے ہیں۔ چین اِس وقت سری لنکا میں سرمایہ کاری کرنے والا سب سے بڑا ملک بن چکا ہے۔ سمندری سِلک روٹ کی گُونج چینی صدر کے مالدیپ اور سری لنکا کے دوروں کے دوران بھی سنی گئی۔ چینی صدر نے اسے باہمی تعاون کا تسلسل قرار دیا۔