بلاگ واچ : ايران کے خلاف امريکی پابنديوں پر بلاگرز کا ردعمل

حالات حاضرہ ميں ان دنوں ايران اور اس کے ايٹمی پروگرام سے متعلق تمام خبريں اہميت کی حامل ہيں کيونکہ ان کا بين الاقوامی معیشت اور سياست پرگہرا اثر پڑ رہا ہے۔ اپنے متنازعہ ايٹمی پروگرام کے پيش نظر ايران کو مغربی ممالک اور خاص طور پر امريکہ کی جا نب سے سخت دباؤ کا سامنا ہے۔ ايران کا کہنا ہے کہ اس کا ايٹمی پروگرام پر امن مقاصد کے لیے ہے اور وہ ملک کی بڑھتی ہوئی توانائی کی مانگ کو پورا کرنے کے ليے ہے۔ امريکی اور يورپی يونين کے حکام کا مؤقف ہے کہ ايران اپنے ايٹمی پروگرام کے ذريعے ہتھیار تيار کر رہا ہے۔

اس حوالے سے ايران پر امريکہ اور يورپی يونين کی جانب سے متعدد پابندياں عائد ہيں اور اب، ايرانی تيل کی برآمد روکنے کے فيصلے سے ايرانی معيشت مزيد کمزور پڑ جائے گی۔ امريکی حکام ان دنوں ايشيائی اور يورپی ممالک پر، ايرانی تيل کی برآمد روکنے کے ليے سفارتی دباؤ ميں مصروف ہيں۔ رواں ماہ کے آغاز ميں يورپی يونين کے سفارتکاروں نے بتايا کہ رکن ممالک، ايران سے تيل کی برآمد پر پابندياں عائد کرنے پر متفق ہيں اور اس سلسلے ميں حتمی فيصلہ برسلز ميں ہونے والے تيس جنوری کے یورپی يونين کے وزرائے خارجہ کے اجلاس ميں متوقع ہے۔ البتہ چين، روس اور بھارت سمیت مختلف ممالک ان پابنديوں کے اطلاق کے حوالے سے تحفظات رکھتے ہيں۔ اس حوالے سے چينی حکام نے ايرانی تيل کی درآمد کا دفاع کرتے ہوئے کہا کہ وہ چين کی توانائی کی ضروريات کے ليے اہم ہيں۔ اسی دوران بھارت ميں بھی حکومت پر دباؤ بڑھتا جا رہا ہے کہ وہ اپنے مفادات کا خيال رکھتے ہوئے فيصلہ کرے۔ بھارت ميں ايرانی تيل کی درآمدات کا حجم اس وقت بارہ فيصد ہے اور تجزیہ کاروں کا ماننا ہے کہ بھارتی حکومت کو ايران کے ساتھ تجارتی روابط برقرار رکھنے چاہئیں۔

ٹائمز آف انڈیا کی ويب سائٹ پر شائع ہونے والے ايک بلاگ ميں انديرا بگچی نے اپنے خيالات کا اظہار کرتے ہوئے کہا کہ جيسے جيسے مغربی ممالک ايران کو تنہا کر رہے ہيں، بھارت کے پاس اپنے روابط بہتر کرنے کا ايک سنہری موقع ہے۔ ان کے مطابق موجودہ حالات اور بھارتی تجارتی مفادات کو مدنظر رکھتے ہوئے اس وقت امريکی دباؤ پر ايران سے روابط توڑنا بھارت کے ليے مناسب نہيں۔

دوسری جانب، اريندھم چودھری اپنے بلاگ ميں لکھتی ہيں کہ امريکہ کی جانب سے اس جارہانہ رويے کا مقصد محض ايران کی معيشت کو تباہ کرنا ہے۔ ان کے مطابق ايران پر مجموعی طور پر پندرہ پابندياں عائد کی جا چکی ہيں جن ميں سے گزشتہ ماہ امريکی صدر باراک اوباما کی جانب سے National Defense Authorization Act for Fiscal Year 2012 کے تحت ايرانی سينٹرل بينک کے ساتھ تمام روابط معطل کرنے کی پابندی سب سے زیادہ کڑی تھی۔

چين کے پس منظر ميں خبر رساں ادارے روئٹرز کے کالم نگار، جان فولی لکھتے ہيں کہ يورپی ممالک کی جانب سے ايرانی تيل کی برآمدات پر پابندی کے اطلاق کے بعد پيدا ہونے والی صورتحال، چين کے ليے انتہائی فائدہ مند ہو سکتی ہے۔ اس صورتحال ميں چين، ايران کے ساڑھے چار لاکھ بيرل یومیہ کا ايک بڑا خريدار بن سکتا ہے جس پر اسے تيس ڈالر فی بيرل تک کی رعايت بھی مل سکتی ہے۔

ان بلاگرز اور متعداد افراد کے ردعمل سے يہ بات صاف ظاہر ہے کے يورپی ممالک کے برخلاف ايشيائی ممالک ميں امريکی اقدامات کو خاص پذيرائی نہيں مل رہی ہے۔ اس ماہ کے اختتام پر يورپی يونين کے اجلاس ميں پابنديوں کے اطلاق کا فيصلہ کيا جا سکتا ہے۔

رپورٹ : عاصم سليم

ادارت: ندیم گِل