بنگلہ دیش میں ایک اور ہندو پروہت کا قتل

ہندو پنڈت نتیارنجن پانڈےکی لاش پبنا شہر میں اُس کے آشرم کے قریب سے ملی۔ رواں ہفتے کے دوران یہ بنگلہ دیش میں کسی ہندو پروہت کے قتل کا دوسرا واقعہ ہے۔ پولیس کے مطابق اس پجاری کو صبح کے وقت معمول کی سیر کے دوران حملہ کر کے موقع پر ہی ہلاک کر دیا گیا۔ مقتول پبنا شہر میں واقع ہندوؤں کے ایک اہم مندر سے منسلک تھا۔

کسی عسکریت پسند گروہ کی جانب سے اس قتل کی ذمہ داری تاحال قبول نہیں کی گئی۔ پبنا شہر کی پولیس کے سربراہ عالمگیر کبیر کا کہنا ہے کہ مبینہ اسلامی بنیاد پرست اس جرم میں ملوث ہو سکتے ہیں۔ 60 سالہ نتیارنجن پانڈے کو خنجروں سے وار کر کے قتل کیا گیا۔

مقتول پانڈے بنگلہ دیش کے شمال مغربی شہر پبنا میں واقع شری شری ٹھاکر انُوکُل چندر نامی آشرم سے وابستہ تھا۔ پولیس کے مطابق یہ قتل اُسی طرح کیا گیا، جس طرح گزشتہ کئی ماہ کے دوران بنگلہ دیش کے مسلم عسکریت پسند متعدد اقلیتی شہریوں اور سرگرم سیکولر کارکنوں کو قتل کر چکے ہیں۔ ضلعی پولیس کے سربراہ عالمگیر کبیر کے مطابق اس قتل کا بھی کوئی چشم دید گواہ نہیں ہے کیونکہ یہ واردات صبح سویرے کی گئی۔

بنگلہ دیش میں گزشتہ تین برسوں کے دوران درجنوں سیکولر اور آزاد خیال شہریوں سمیت مذہبی اقلیتوں سے تعلق رکھنے والے مجموعی طور پر پچاس کے قریب افراد ہلاک کیے جا چکے ہیں۔ ایسی کئی وارداتوں کی ذمہ داری شام اور عراق میں سرگرم عسکریت پسند تنظیم ’اسلامک اسٹیٹ‘ قبول کر چکی ہے تاہم حکومتی اہلکار اس بات سے انکاری ہیں کہ بنگلہ دیش میں ’اسلامک اسٹیٹ‘ کا کوئی وجود ہے۔ حکام کا اصرار ہے کہ یہ بہیمانہ کارروائیاں مقامی مسلم انتہا پسند کرتے ہیں۔

قتل کی یہ جملہ وارداتیں دارالحکومت ڈھاکا سے لے کر شمال اور جنوب کے دور دراز علاقوں تک میں کی گئیں۔ ان میں انسدادِ دہشت گردی کے سرکاری ادارے کے ایک اہم اہلکار کی بیوی بھی شامل ہے۔ یہ حکومتی اہلکار کالعدم جمعیت المجاہدین کے خلاف کئی اہم آپریشنز میں شریک رہا ہے۔ حکومت اور سکیورٹی اداروں کی انگلیاں جمعیت المجاہدین کے انتہا پسندوں کی جانب ہیں اور اُن کے مطابق ایسی بہت سی وارداتوں کے مرتکب افراد کا تعلق اسی شدت پسند تنظیم سے تھا۔

دوسری جانب پولیس کے عسکریت پسندوں کے خلاف گزشتہ ایک ہفتے سے جاری کریک ڈاؤن کے دوران دو ہندو پروہتوں کے قتل نے اس آپریشن کے اثرات اور نتائج کو بظاہر کم کر دیا ہے۔ تین روز قبل پولیس اور عسکریت پسندوں کے درمیان ہونے والے فائرنگ کے تبادلے میں ایک کالعدم مذہبی عسکری تنظیم کے کم از کم پانچ انتہا پسند ہلاک بھی کر دیے گئے تھے۔