بوسٹن حملے: تیمرلان کے لیے قبر کی تلاش

چھبیس سالہ تیمرلان زرنائیف کی موت کے اُنیس روز بعد اُس کی تدفین کا تنازعہ شدت اختیار کر گیا ہے۔ وورچیسٹر کے پولیس چیف Gary Gemme نے کہا: ’’ہم وحشی نہیں ہیں۔ ہم مرنے والوں کو دفن کرتے ہیں۔‘‘ اُنہوں نے کہا کہ کسی کو بھی آگے آنا چاہیے اور قبرستان میں تدفین کے لیے جگہ کی پیشکش کرنی چاہیے۔

ابھی ایک روز پہلے اسی پولیس چیف نے یہ کہا تھا کہ تیمرلان کی میت کو ایک ریاستی جیل میں دفن کرنے سے متعلق پیر کو طے کیا جانے والا سمجھوتہ منسوخ کر دیا گیا ہے۔ جیلوں کے نگران سرکاری محکمے ڈیپارٹمنٹ آف کریکشن نے اپنے ایک بیان میں کہا کہ جیل کے اندر تدفین کی سہولت صرف اُن قیدیوں کے لیے مخصوص ہے، جن کا حراست کے دوران انتقال ہوتا ہے۔

پولیس کا کہنا ہے کہ جس مقام پر تیمرلان زرنائیف کی میت اِس وقت پڑی ہوئی ہے، وہاں سکیورٹی فراہم کرنے پر دَسیوں ہزار ڈالر خرچ ہو رہے ہیں۔ پولیس چیف Gemme کے مطابق تیمرلان کی میت کو اُس کے آبائی وطن روس بھیجنا ’زیر غور نہیں‘ ہے۔

بوسٹن شہر کے میئر تھامس مینینو نے اپنے ایک قریبی ساتھی کے ذریعے کہلوایا ہے، وہ نہیں چاہتے کہ بم حملے کے مشتبہ ملزم کو اِس شہر میں دفن کیا جائے۔ وورچیسٹر کے ’فیونرل ہوم‘ کے ڈائریکٹر پیٹر اسٹیفن کے مطابق امریکا اور کینیڈا سے اب تک قبروں کی جتنی بھی پیشکشیں آئی ہیں، وہ اس لیے قابل عمل نہیں ہیں کیونکہ متعلقہ شہروں اور قصبوں کے حکام نے بھی تیمرلان زرنائیف کی اپنے ہاں تدفین سے انکار کر دیا ہے۔

جہاں تیمرلان زرنائیف پولیس کے ساتھ فائرنگ میں ہلاک ہو گیا تھا، وہاں اُس کے چھوٹے بھائی جوہر زرنائیف کو گرفتار کر لیا گیا تھا۔ اُنیس سالہ جوہر زرنائیف آج کل جیل کے ہسپتال میں ہے اور اُسے ایسے الزامات کا سامنا ہے، جن میں اُسے موت کی سزا بھی ہو سکتی ہے۔

امریکا میں تدفین کے قوانین کی ایک ماہر اور ویک یونیورسٹی کی پروفیسر تانیا مارش کے مطابق تیمرلان زرنائیف کی تدفین کے خلاف مزاحمت ایک ایسے ملک میں ایک غیر معمولی واقعہ ہے، جہاں صدر جان ایف کینیڈی کے قاتل لی ہاروے اوسوالڈ سے لے کر گزشتہ برس کنیٹیکٹ میں بیس طلبا اور چھ اساتذہ کو ہلاک کرنے والے ایڈم لینزا جیسے بدنامِ زمانہ قاتلوں کو بھی دفن کرنے کا کوئی نہ کوئی راستہ تلاش کر لیا جاتا رہا ہے۔

امریکی حکام یہ جانچنے کی کوشش کر رہے ہیں کہ آیا تیمرلان زرنائیف نے 2012ء میں روسی علاقے داغستان کے ایک دورے کے دوران وہاں عسکریت پسندوں سے تربیت حاصل کی تھی۔ دونوں چیچن نژاد بھائیوں کے سلسلے میں ہونے والی تحقیقات میں امریکی اور روسی حکام مل کر کام کر رہے ہیں۔

تیمرلان زرنائیف کی بیوہ کیتھرین رسل کو بھی تفتیشی حکام کے سوالات کا سامنا کرنا پڑ رہا ہے۔ چوبیس سالہ کیتھرین رسل نے تیمرلان کے ساتھ 2010ء میں شادی کی تھی اور اُن کی ایک دو سالہ بیٹی بھی ہے۔

aa/mm(ap)