بھارتی طیاروں کی پاکستان کے زیر انتظام کشمیر میں بمباری

پاکستانی دارالحکومت اسلام آباد سے منگل چھبیس فروری کی صبح ملنے والی نیوز ایجنسی ایسوسی ایٹڈ پریس کی رپورٹوں کے مطابق بھارتی ایئر فورس کے طیاروں نے، جن کی مختلف ذرائع نے تعداد تین بتائی ہے، آج صبح کشمیر کے متنازعہ اور منقسم خطے کے پاکستان کے زیر انتظام حصے میں کنٹرول لائن پار کر کے مظفرآباد سیکٹر میں بمباری کی۔

اس بمباری کی پاکستانی فوج کے ترجمان میجر جنرل آصف غفور نے بھی تصدیق کر دی ہے۔ انہوں نے کہا، ’’بھاتی طیارے کنٹرول لائن پار کر کے پاکستان کے زیر انتظام کشمیر کے سرحدی علاقے میں بالاکوٹ کے قریب فضا میں داخل ہوئے، تو پاکستانی جنگی طیاروں نے ان کا پیچھا کیا۔ اس پر بھارتی طیارے جلدبازی میں اپنا بارودی مواد گرا کر واپس چلے گئے۔‘‘

بالا کوٹ میں پولیس کے سربراہ صغیر حسین شاہ نے ان بھارتی فضائی حملوں کے بعد ایسوسی ایٹڈ پریس کو بتایا کہ انہوں نے متعلقہ علاقے کی طرف پولیس کی ٹیمیں روانہ کر دی ہیں اور جہاں بھارتی طیاروں نے بم گرائے، وہ زیادہ تر ایک غیر آباد جنگلاتی علاقہ ہے۔

 

انہوں نے کہا، ’’فوری طور پر اس بمباری کی وجہ سے کسی کی ہلاکت یا زخمی ہونے کی کوئی اطلاع نہیں ہے اور نہ ہی کسی نقصان کی کوئی رپورٹیں ملی ہیں۔‘‘

مختلف خبر رساں اداروں کے مطابق پاکستان کے زیر انتظام کشمیر میں بھارتی طیاروں کی ان کارروائیوں کے بعد سرکاری طور پر اس بمباری کے چند گھنٹے بعد تک بھی نئی دہلی حکومت کی طرف سے اس بارے میں کچھ نہیں کہا گیا تھا۔ نئی دہلی ٹیلی وژن کے مطابق بھارتی کابینہ کی سکیورٹی کمیٹی کا ایک اجلاس آج منگل ہی کے روز وزیر اعظم نریندر مودی کی صدارت میں ہو رہا ہے۔

پاکستان اور بھارت کے مابین کھچاؤ یوں تو عشروں پرانا ہے اور حالیہ شدید کشیدگی اس وقت اپنی انتہا پر پہنچ گئی تھی جب چودہ فروری کو بھارت کے زیر انتظام کشمیر کے ضلع پلوامہ میں ایک خود کش کار بم حملہ کیا گیا تھا۔ اس حملے میں بھارتی نیم فوجی دستوں کے چالیس سے زائد اہلکار مارے گئے تھے۔

بھارت کی طرف سے اس حملے کا الزام پاکستان پر لگایا گیا تھا، یہ کہتے ہوئے کہ اس حملے کے مرتکب عناصر کو مبینہ طور پر پاکستان  کی پشت پناہی حاصل تھی۔ اس دہشت گردانہ حملے کی ذمے داری کالعدم عسکریت پسند تنظیم جیش محمد نے قبول کر لی تھی۔ پاکستان نے لیکن اس حملے میں اپنے کسی بھی طرح ملوث ہونے سے انکار کرتے ہوئے کہا تھا کہ بھارتی الزامات غلط ہیں اور اسلام آباد حکومت اس حملے کی چھان بین سے متعلق بھارت کے ساتھ ہر قسم کا تعاون کرنے کے لیے تیار ہے۔

پاکستان اور بھارت، جو دونوں ہی ایٹمی طاقتیں ہیں اور شروع سے ہی ایک دوسرے کے حریف ہمسایہ ممالک ہیں، عشروں بعد ایک بار پھر باہمی کشیدگی کی اس حد تک پہنچے ہیں کہ اب بھارتی ایئر فورس کے جنگی طیاروں نے پاکستان کے زیر انتظام کشمیر میں بمباری کی ہے۔

م م / ا ب ا / اے پی