بھارت میں مقیم روہنگیا افراد کو ملک بدر کیے جانے کا خوف

روہنگیا اقلیت کے افراد کے پہلے گروپ کو رواں ماہ چار اکتوبر کو بھارتی سپریم کورٹ میں اُن کی جانب سے دائر اپیل کے آخری لمحوں میں رد کیے جانے کے بعد ڈی پورٹ کیا گیا تھا۔

 بھارتی حکومت کا کہنا ہے کہ یہ ملک بدریاں معمول کا حصہ ہیں اور  یہ کہ غیر قانونی طور پر مقیم تمام غیر ملکی افراد کو واپس بھیجا جائے گا۔ دہلی حکومت نے گزشتہ سال ملک میں غیر قانونی طور پر داخل ہونے والے روہنگیا مسلمانوں اور دیگر افراد کی ملک بدری کا فیصلہ کیا تھا۔

سن 2010 میں میانمار سے بھارت آنے والے ایک روہنگیا مسلمان پناہ گزین شاہد اللہ کا کہنا ہے کہ بھارتی میڈیا پر سات روہنگیا افراد کو واپس میانمار بھیجے جانے کی خبر چلنے کے بعد اسے اپنے بھتیجے کا فون موصول ہوا۔ شاہد اللہ کے بھتیجے نے انہیں کہا،’’ انکل پلیز ہمیں یہاں سے نکال لیں۔ یہ ہمیں بھی واپس میانمار بھیج دیں گے۔‘‘

شاہد اللہ نے خبر رساں ادارے روئٹرز کو بتایا کہ اس کا چالیس سالہ رشتہ دار سعدی الرحمان ریاست آسام کی ایک ایسی جیل میں قید ہے جہاں غیر قانونی طور پر بھارت آنے والے تارکین وطن کو رکھا جاتا ہے۔

شاہد اللہ نے بتایا کہ رحمان کو اس کے بھائی اور آٹھ دیگر رشتہ داروں سمیت سن 2012 میں میانمار  سے بھارت پہنچنے پر ایک ریلوے اسٹیشن سے گرفتار کر لیا گیا تھا۔

شاہداللہ کے بقول رحمان نے اسے تین اکتوبر کو فون کیا جب اسے معمول کے میڈیکل چیک اپ کے لیے ہسپتال لایا گیا۔ یہ وہی دن تھا جب بھارتی حکام  ایک ایسی ہی جیل سے سات روہنگیا افراد کو نکال کر بارڈر پر لے گئے تھے اور اگلے روز انہیں میانمار حکومت کے حوالے کر دیا تھا۔

شاہد اللہ سمیت عالمی ادارہ مہاجرت کی جانب سے بھارت میں قریب سولہ ہزار پانچ سو روہنگیا افراد کو شناختی کارڈ جاری کیے گئے ہیں۔ یو این ایچ سی آر کے مطابق یہ شناختی کارڈ ان مہاجرین کو ہراساں کیے جانے، گرفتاریوں اور ملک بدریوں کے خلاف مدد گار ثابت ہوتے ہیں۔

تاہم بھارت یو این ایچ سی آر کی اس شناختی دستاویز کو تسلیم نہیں کرتا اور اس عالمی ادارے کے اُس موقف کو بھی مسترد کرتا ہے جس کے مطابق روہنگیا افراد کو اُن کے لیے خطرات سے بھر پور ملک یعنی میانمار جبری طور پر واپس بھیجنا اصول کی خلاف ورزی ہے۔

یاد رہے کہ بدھ مت اکثریت والے ملک میانمار میں روہنگیا اقلیت سے تعلق رکھنے والے افراد کو حکومت شہریت دینے سے انکار کر دیتی ہے۔ اس اقدام کو عالمی سطح پر تنقید کا نشانہ بنایا گیا ہے۔

اگست سن 2017 سے قریب سات لاکھ روہنگیا افراد بنگلہ دیش میں پناہ لے چکے ہیں۔ اندازوں کے مطابق چالیس ہزار روہنگیا باشندے بھارت کے مختلف علاقوں میں کیمپوں میں پناہ لیے ہوئے ہیں۔ ان میں سے زیادہ تر کیمپ ہریانہ، راجھستان اور جموں وکشمیر میں قائم ہیں۔ چالیس ہزار میں سے صرف پندرہ ہزار ہی یو این ایچ سی آر کے پاس رجسٹرڈ ہیں۔

ص ح / ا ا / روئٹرز