تائیوان میں زور دار زلزلہ

تائنان شہر کی کئی بلند و بالا عمارتیں زلزلے کے جھٹکوں کے بعد خطرناک حد تک ٹیڑھی اور ترچھی ہو گئی ہیں۔ ان کے گرنے کا خطرہ پیدا ہو گیا ہے۔

جنوبی تائیوان کے شہر تائنان میں سینکڑوں امدادی ورکرز اور کئی مشینیں زلزلے سے گرنے والی ایک عمارت کا ملبہ ہٹانے میں مصروف ہیں۔

گرنے والی عمارت کے ایک ہال میں نئے قمری سال کی خوشی میں لوگ جمع تھے اور زیادہ تر زخمی بھی اسی ہال میں جاری اجتماع کے شرکاء تھے۔

تائنان میں زلزلے سے گرنے والی ایک عمارت کے ملبے سے چالیس سے زائد زخمیوں کو نکال کر ہسپتالوں میں پہنچا دیا گیا ہے۔

تائنان شہر کے میئر امدادی عمل کی نگرانی کر رہے ہیں۔۔ شہری انتظامیہ نے زخمیوں کو فوری طبی امداد کی فراہمی کے لیے ہسپتالوں میں خصوصی انتظامات کا حکم جاری کر دیا ہے۔

زلزلے سے منہدم ہونے والی عمارت میں کم از کم آٹھ انسان جاں بحق ہوئے، جن میں ایک دس روز کی نوزائیدہ بچی بھی شامل ہے۔ کئی چھوٹے بچوں کو ملبے میں سے زندہ باہر نکال لیا گیا ہے۔

تائیوان کے شہر تائنان میں آنے والے زلزلے کے نتیجے میں گرنے والی عمارت کے ملبے سے پارک کی ہوئی کئی موٹر گاڑیاں بھی تباہ ہو گئیں۔

سولہ منزلہ رہائشی عمارت کے ملبے کو ہٹانے کے لیے بھاری کرینوں کا سہارا لیا جا رہا ہے اور اِس عمل میں کنکریٹ اور فولادی ملبے کو ہٹانے میں مشکلات حائل ہیں۔

تائنان کی منہدم ہونے والی عمارت میں بانوے خاندان اور اُن کے دو سو چھپن افراد رہائش پذیر تھے۔

تائنان میں نئے قمری سال کے آغاز پر پرمسرت تقریبات کا خاص اہتمام کیا جاتا ہے لیکن اِس مرتبہ تائنان کے زلزلے میں ہونے والی ہلاکتوں نے سارے ملک پر سوگواریت طاری کر دی ہے۔

تائنان شہر کے میئر ولیم لائی کے مطابق یہ کہنا ابھی قبل از وقت ہے کہ ہلاکتوں کی وجہ منہدم ہونے والی عمارت میں استعمال ہونے والا غیر معیاری اور ناقص تعمیراتی مواد تھا۔