کشمیر کی پہلی خاتون فوٹوگرافر پلٹزر ایوارڈ سے سرفراز

کشمیر کی 28 سالہ فوٹو جرنلسٹ ثنا ارشاد مٹو با وقار پلٹزر پرائز جیتنے والی پہلی کشمیری خاتون بن گئی ہیں۔ یہ ایوارڈ انہیں روئٹرز ٹیم کے اپنے تین دیگر ساتھیوں کے ساتھ شیئر کرنا ہے۔ انعامات کا اعلان امریکہ کی کولمبیا یونیورسٹی نے کیا ہے۔

کشمیری صحافیوں کو اس سے پہلے بھی اس اعزاز سے نوازا جا چکا ہے تاہم ثنا مٹو پہلی کشمیری خاتون ہیں، جنہیں یہ انعام ملا ہے۔ ڈی ڈبلیو اردو سے بات چیت میں انہوں نے اس کامیابی پر کافی خوشی کا اظہار کیا۔ 

اس سے قبل جموں و کشمیر کے تین فوٹو صحافیوں کو وادی کشمیر میں زندگی کی حیرت انگیز تصاویر کے لیے 2020 کے پلٹزر پرائز سے نوازا گیا تھا۔ ایسوسی ایٹڈ پریس کے چنی آنند، مختار خان اور ڈار یاسین کو فیچر نیوز فوٹوگرافی کے لیے یہ انعام دیا گیا تھا۔ 

 اس برس بھارت کے دانش صدیقی، عدنان عابدی، امیت دیو اور ثنا ارشاد مٹو کو ایک ساتھ فیچر فوٹوگرافی کے زمرے میں اس اعزاز سے نوازا گیا ہے۔ یہ تمام صحافی خبر رساں ادارے روئٹرز کے لیے کام کرتے ہیں، جن میں سے دانش صدیقی گزشتہ برس افغانستان میں ہلاک ہو گئے تھے۔ 

دانش صدیقی کا سفر  

دانش صدیقی اور ان صحافیوں کو بھارت میں کووڈ 19 بحران کی کوریج کے لیے فیچر فوٹوگرافی کے لیے پلٹزر پرائز سے نوازا گیا ہے۔ یہ ان کے لیے دوسرا پلٹزر انعام ہے۔ اس سے قبل سن 2018 میں انہیں روہنگیا بحران کی کوریج کے لیے اسی با وقار ایوارڈ سے نوازا گیا تھا۔

 گزشتہ برس جولائی میں فوٹو جرنلسٹ دانش صدیقی قندھار میں افغان فوج اور طالبان کے مابین ہونے والی ایک جھڑپ میں ہلاک ہو گئے۔ وہ خبر رساں ادارے روئٹرز کے ساتھ وابستہ تھے۔

اڑتیس سالہ صدیقی جولائی میں افغانستان کے قندھار شہر کے اسپن بولدک میں افغان فوجیوں اور طالبان کے درمیان جھڑپوں کی کوریج کرنے کے دوران مارے گئے تھے۔

دانش صدیقی کو دنیا کے بہترین فوٹو صحافیوں سے میں سے ایک مانا جاتا تھا۔ انہوں نے عراق میں داعش کے خلاف ہونے والی موصل جنگ، میانمار کے روہنگیا بحران، ہانگ کانک کے مظاہرے، نیپال کے زلزلے اور دو برس قبل دہلی میں ہونے والے مسلم کش فسادات جیسے بڑے عالمی واقعات کی رپورٹنگ کی تھی۔

اس حوالے سے ان کی سینکڑوں تصاویر کو عالمی سطح پر سراہا گیا۔ انہیں انعامات و اعزازات سے بھی نوازا گیا تھا۔ ان کے بارے میں کہا جاتا ہے کہ وہ ایک ایسے فوٹوگرافر تھے جنہوں نے اپنی تصاویر کو انتہائی شدید قسم کے جذبات، خاموش چیخ و پکار اور زندگی کے رنگوں سے بھرا۔

دانش نے دہلی کی معروف جامعہ ملیہ اسلامیہ یونیورسٹی کے شعبہ ماس کمیونکیشن سے تعلیم حاصل کی تھی۔

 اس برس امریکی اخبار واشنگٹن پوسٹ کو چھ جنوری 2021 میں کیپٹیل ہل پر ہونے والے حملے کی تفصیلی کوریج کے لیے پلٹزر انعام دیا گيا ہے۔ اخبار کو  ملک کے سیاہ ترین دنوں میں سے ایک کے بارے میں عوام کو مکمل اور غیر متزلزل معلومات فراہم کرنے کے لیے یہ اعزاز سونپا گیا ہے۔