جان کیری مشرق وسطیٰ امن مذاکرات کے حوالے سے پر امید

امریکی خبر رساں ادارے اے پی کے مطابق امریکی، اسرائیلی اور فلسطینی حکام گزشتہ تین روز سے جاری ملاقاتوں کی تفصیلات عام نہیں کر رہے ہیں اور کیری کی جانب سے تیسری بار صدر محمود عباس سے ملاقات کے لیے روانہ ہونا اس بات کا ثبوت ہے کہ انہیں امن مذکرات کی بحالی کی امید ہے۔ جان کیری نے یروشلم سے رملہ روانہ ہوتے وقت صحافیوں سے محض اتنا کہا ’’سخت محنت ہورہی ہے‘‘۔

اے پی کے مطابق اگرچہ بند دروازوں کے پیچھے کی ان ملاقاتوں سے متعلق تفصیلات ابھی مخفی ہیں تاہم کئی ایسے اشارے موجود ہیں ان ملاقاتوں میں محض معمول کی باتیں نہیں ہورہیں۔

امریکی وزیر کی فلسطینی اور اسرائیلی رہنماؤں کے ساتھ بیشتر ملاقاتیں کم از کم دو گھنٹے یا اس بھی زیادہ دیر تک جاری رہیں۔ جمعرات کو اسرائیلی وزیر اعظم نیتین یاہو کے ساتھ ان کی ملاقات کا وقت شام کے چار بجے رکھا گیا تھا جبکہ ہفتے کی شب اسرائیلی وزیر اعظم اور اُن کے مشیروں کے ساتھ جان کیری نے ایک ہوٹل میں قریب چھ گھنٹے تک ملاقات کی۔ صبح تین بجے انہوں نے اپنے سینیئر میشروں کے ساتھ یروشلم میں چہل قدمی کی اور اس موقع پر وہ خاصے سنجیدہ دکھائی دے رہے تھے۔

نیتن یاہو کے ساتھ جان کیری سے ملنے والوں میں اسرائیل کے قانونی اور دفاعی امور کے افسران بھی موجود تھے، جس سے یہ قیاس کیا جارہا ہے کہ مذاکرات مزید تفصیلی مراحل میں داخل ہوگئے ہیں۔

جان کیری مشرق وسطیٰ میں اپنی مصروفیات کی وجہ سے ابوظہبی کا دورہ منسوخ کرچکے ہیں۔ اے پی نے امریکی دفتر خارجہ کے ذرائع کے حوالے سے بتایا کہ جان کیری آج اتوار کو رملہ میں صدر محمود عباس سے ملیں گے۔ جان کیری کی اگلے ہفتے برونائی میں جنوب مشرقی ایشیاء کی سلامتی کانفرنس کے موقع پر روسی وزیر خارجہ سیرگئی لاوروف سے ملاقات کا امکان ہے، جس دوران کئی بین الاقوامی اہمیت کے امور پر تبادلہ خیال کیا جائے گا۔