جرمنی پر غصہ، آسٹریا کا ملکی سرحدوں پر مشقوں کا آغاز

آسٹریا کی حکومت نے آج بروز منگل اپنی سرحدوں پر پولیس اور فوج کی پٹرول ٹریننگ کی مشقیں کرنے کا اعلان کیا ہے۔ آسٹرین رہنماؤں کے مطابق یہ اقدام  مہاجرین کے مسئلے پر جرمن حکومت سے بڑھتی ہوئی خلیج کے رد عمل کے طور پر اٹھایا جا رہا ہے۔

آسٹریا میں انتہائی دائیں بازو کی جماعت فریڈم پارٹی سے تعلق رکھنے والے ملکی نائب چانسلر ہائینس کرسٹیان شٹراخے نے جرمن روزنامے ’بلڈ‘ کو دیے گئے اپنے ایک انٹرویو میں کہا، ’’منگل کے روز بڑے پیمانے پر پولیس اور فوج کو پٹرولنگ کی مشقیں کرائی جائیں گی۔ اس موقع پر نئے ’پوما پولیس بارڈر پروٹیکشن یونٹ‘ کو بھی متعارف کرایا جائے گا۔‘‘

شٹراخے کا مزید کہنا تھا، ’’سلووینیا اور آسٹریا کی سرحد پر ان مشقوں کے ذریعے ہم خود کو تمام ممکنہ تبدیلیوں کے لیے تیار کرنا چاہتے ہیں اور ساتھ ہی یہ پیغام بھی دینا چاہتے ہیں کہ اب زیادہ عرصے تک سن 2015 کی طرح آسٹرین سرحدوں پر کنٹرول میں نرمی اور یہاں سے آزادانہ گزرگاہ میسر نہیں ہو گی۔ ان مشقوں کا ہونا یورپی یونین کی اندرونی سرحدوں کی بندش پر اُس بحث کے نتیجے میں ضروری سمجھا گیا جس کا آغاز جرمنی نے کیا تھا۔‘‘

آسٹریا میں دائیں بازو کی اعتدال پسند جماعت سے تعلق رکھنے والے ملکی چانسلر سباستیان کُرس نے کہا، ’’ہم اپنی سرحدوں کی حفاظت ہر صورت میں کریں گے اور ہر طرح تیار رہیں گے۔ اس کا مطلب یہ ہے کہ اطالوی سرحد پر برینیر کے مقام پر تو کنٹرول سخت کیا جائے گا ہی تاہم دیگر بہت سے سرحدی مقامات پر بھی پٹرولنگ کو مزید مؤثر بنایا جائے گا۔‘‘

کُرس کا کہنا تھا کہ وہ یورپی یونین کے ساتھ تعاون کرنا چاہتے ہیں اور نہیں چاہتے کہ نوبت یہاں تک پہنچے۔ آسٹرین چانسلر کا موقف تھا کہ اس ضمن میں سب سے پہلی ترجیح غیر قانونی تارکین وطن کو یورپی یونین میں آنے سے روکنا ہونی چاہیے۔ ایسی صورت میں اندرونی سرحدیں بند کرنے کی ضرورت نہیں رہے گی۔

ص ح/ ش ح / نیوز ایجنسی