جرمن خاتون فوٹوگرافر کی تصاویر کی لاہور میں نمائش

اس نمائش کا افتتاح پاکستان کی معروف ماہر تعلیم اور کنیئرڈ کالج کی سابق سربراہ ڈاکٹر میرا فیلبوس نے کیا۔ ان کا کہنا تھا کہ جرمن فوٹو گرافر نے جس مہارت سے پاکستانی گاؤں کے مناظر کو تصویروں میں سمویا ہے وہ متاثرکن ہے۔

پاکستانی پنجاب کے ایک گاؤں کی گلی کا یہ منظر بھی اس نمائش کی زینت ہے۔ اس نمائش میں پاکستان کی دیہی زندگی کی عکاسی کرنے والی سو کے قریب تصاویر رکھی گئیں۔

نمائش دیکھنے کے لیے مقامی کالجوں کی طالبات بھی بڑی تعداد میں الحمرا آرٹ کونسل پہنچیں اور اس نمائش کو نہایت دلچسپی سے دیکھا۔

جرمن فوٹوگرافر بوروفکا جب ایک پاکستانی گاوں میں آئیں تو وہاں کی دیہی زندگی میں گھل مل گئیں۔ ان کا کہنا ہے کہ انتہائی پیار کرنے والے انسانوں نے کھلے دل اور گرمجوشی سے ان کا استقبال کیا تھا۔

مختلف شعبہ ہائے زندگی سے تعلق رکھنے والے لوگوں نے اس تصویری نمائش میں گہری دلچسپی کا اظہار کیا۔

بوروفکا کے کیمرے نے ٹھٹھہ غلام کا نامی گاؤں کے اس سکول کے ابتدائی دنوں کو بھی محفوظ کر لیا جس میں غریب بچیاں جرمن ماہرین سے تربیت لے کر ہینڈی کرافٹ کی مصنوعات تیار کرتی تھیں۔ اب یہاں ویمن آرٹس سنٹر قائم ہے۔

جرمنی کے شہر ہیمبرگ کے قریب خاموش اور پرسکون زندگی گزارنے والی چوراسی سالہ یوروفکا جب 23 برس پہلے پاکستان آئی تھیں انہیں اس دورے کی دعوت اوکاڑہ کے گاؤں میں فلاحی کام کرنے والی ایک جرمن پروفیسر سینتا سِلر نے دی تھی۔

جرمن خاتون فوٹوگرافر ریناٹے بوروفکا کی تصویری یادداشتوں میں گاؤں کی یہ مسجد بھی شامل ہے جو سادگی اور عقیدت کا خوبصورت امتزاج ہے۔

جرمن ماہرین سے تربیت پا کر چھوٹے چھوٹے کھلونے بنانے والی حلیمہ آج اس دنیا میں نہیں ہے لیکن یورو فکا کی تصویروں میں ہونہار حلیمہ کی یادیں زندہ ہیں۔

چاروں طرف سے سبزے میں گھرے اس چھوٹے سے گاؤں کو بوروفکا نے 1994 میں دیکھا اور کیمرے میں محفوظ کر لیا۔

اس نمائش کا اہتمام کرنے والے رفاہی ادارے انجمن فلاح عامہ نے جرمن ماہرین کی زیر نگرانی بچیوں کو مختلف قومیتوں کی گڑیاں بنانے کی تربیت دے رکھی ہے، نمائش کے موقعے پر رنگ برنگی گڑیاؤں کو بہت پسند کیا گیا۔

اس نمائش میں موجود ممتاز جرمن ماہر تعمیرات پروفیسر نوبرٹ پیچ کا کہنا تھا کے برسوں پہلے انہوں نے اپنی اہلیہ سینتا سلر کی خواہش پر گڑیا سازی کے جس فلاحی منصوبے کا آگاز کیا تھا اس سے دیہاتی خواتین کی غربت کم ہوئی۔