جنوبی سوڈان میں ہوائی جہاز حادثہ ، کم از کم 27 ہلاکتیں

صدراتی ترجمان کے مطابق صوبہ بالائی نیل کے شہر پالوچ جانے والا یہ روسی ساختہ جہاز ایئرپورٹ سے محض 800 میٹر کے فاصلے پر گِر گیا۔ مقامی ریڈیو کے مطابق 40 ہلاکتوں کا خدشہ ہے۔

پولیس تباہ ہونے والے روسی ساختہ مال بردار جہاز آنتونوف 12 کے ملبے سے مردوں، خواتین اور بچوں کی لاشیں کھینچ کر باہر نکالنے کا کام جاری رکھے ہوئے ہے۔ یہ کارگو جہاز النیل الابیض کے ایک جزیرے کی ایک کسان کمیونٹی کے رہائشی علاقے پر گرا۔ جس کے نتیجے میں رپورٹروں کے مطابق کم از کم 27 افراد ہلاک ہو گئے۔

اقوام متحدہ کی نگرانی میں کام کرنے والے ریڈیو میرایا پر نشر ہونے والی خبر میں کہا گیا، ’’ایک کارگو طیارہ جو بالائی نیل ریاست کی طرف پرواز کر رہا تھا جوبا انٹرنیشنل ایئر پورٹ کے رن وے سے محض 800 میٹر کے فاصلے پر گر کر تباہ ہو گیا ہے‘‘۔ اس ریڈیو اسٹیشن کی اطلاعات کے مطابق اس فضائی حادثے میں کم از کم 40 افراد کی ہلاکت کا خدشہ ظاہر کیا گیا ہے۔ ریڈیو پر نشر ہونے والی خبر میں یہ بھی کہا گیا ہے کہ ایئر پورٹ حکام نے کہا ہے کہ اس حادثے میں جہاز پر سوار افراد میں سے صرف 3 زندہ بچ سکے ہیں۔

جنوبی سوڈان کے دور دراز علاقوں میں اکثر کارگو طیاروں میں مسافر بھی سوار ہوتے ہیں۔ اطلاعات کے مطابق ہوائی جہاز کا مرکزی حصہ گھنے جنگلی علاقے میں گرا اور جس کے نتیجے میں اس کے ٹکڑے ٹکڑے ہو گئے اور تباہ شدہ جہاز کا ملبہ ساحل سمندر کے وسیع علاقے میں بکھرا دکھائی دیا۔

پولیس اور ملکی حکام اس حادثے میں ہونے والی ہلاکتوں کی کوئی حتمی تعداد بتانے سے قاصر ہیں کیونکہ پولیس یہ نہیں بتا سکتی تھی کہ حادثے کے وقت جہاز پر کتنے لوگ سوار تھے، نہ ہی یہ پتہ چل سکا کہ جب یہ جہاز جزیرے پر گرا تو اُس وقت زمین پر اُس سے ٹکرا کر کتنے لوگ لقمہ اجل بنے۔

اس جزیرے پر چھوٹی کسان برادریاں آباد ہیں۔ جوبا کا ہوائی اڈہ جنگ سے تباہ حال ملک جنوبی سوڈان کا فضائی ٹریفک کے حوالے سے سب سے زیادہ مصروف ایئرپورٹ مانا جاتا ہے۔ یہ ایئر پورٹ کمرشل فلائٹس کے علاوہ کارگو اور ملٹری فلائٹس کی بھی آمد و رفت کا بنیادی ذریعہ ہے۔