خاشقجی کے قتل کے باوجود سعودی عرب کے حلیف ہیں، ٹرمپ

امریکی صدر ڈونلڈ ٹرمپ نے صحافی جمال خاشقجی کے قتل کے معاملے میں سعودی عرب کی قیادت کے خلاف مزید اقدامات نہ اٹھانے کا فیصلہ کیا ہے۔ ٹرمپ کے مطابق امریکا سعودی عرب کا ایک اہم اتحادی ملک ہی رہنا چاہتا ہے۔ ان کے بقول ریاض حکومت کے ساتھ اربوں ڈالر کے عسکری معاہدے ختم کرنا ایک بڑی غلطی ہو گی۔

ٹرمپ کے مطابق اقتصادیات کی وجہ سے بھی یہ ضروری ہے اور اس صورتحال سے روس اور چین سب سے زیادہ فائدہ اٹھا سکتے ہیں۔ امریکی صدر کے مطابق یہ ابھی تک غیر واضح ہے کہ سعودی فرمانروا محمد بن سلمان کو خاشقجی کے قتل کا علم تھا۔

ٹرمپ نے یہ بھی کہا کہ جمال خاشقجی قتل کے گرد پھیلے ہوئے حالات و واقعات کا احاطہ ابھی تک ممکن نہیں ہو سکا ہے لیکن اس صورت حال کے باوجود سعودی سلطنت کے ساتھ امریکی تعلقات بہت اہمیت کے حامل ہیں۔ ٹرمپ کے مطابق امریکا اور سعودی عرب بااعتماد اتحادی ہیں۔

دوسری جانب ایران نے جمال خاشقجی کے قتل کے پہلو میں سعودی عرب کی حمایت جاری رکھنے کے بیان پر حیرت کا اظہار کیا ہے۔ ایرانی وزیر خارجہ محمد جواد ظریف نے امریکی صدر ڈونلڈ ٹرمپ کے اُس بیان کو مضحکہ خیز قرار دیا ہے جس میں ٹرمپ نے کہا ہے کہ خاشقجی کے قتل کے باوجود امریکا سعودی عرب کے ساتھ کھڑا ہے۔

ظریف نے کہا کہ امریکی صدر ایران پر تنقید کرنے کے لیے سعودی عرب کے ظلم و بربریت کو درست قرار دینے کی پوری کوشش کرتے ہیں۔ ٹرمپ کے بیان کا تمسخر اڑاتے ہوئے ایرانی وزیر خارجہ نے یہ بھی کہا کہ اُن کا ملک بھی شاید کیلیفونیا کی جنگلاتی آگ کا ذمہ دار ٹھہرایا جائے کیونکہ انہوں نے ان جنگلات میں سے خشک گھاس اور گری ہوئی لکڑیاں جمع کرنے میں حصہ نہیں لیا تھا۔