’خود کش حملہ آوروں کی تیاری ، شمالی وزیرستان میں‘

تیرہویں صدی عسیوی کے معروف صوفی بزرگ حضرت احمد سلطان المعروف سخی سرور کے دربار پر ناکام خود کش حملے کے نتیجے میں زخمی ہو جانے والے عمر فدائی نے جمعہ کو ہسپتال میں صحافیوں کو بتایا کہ پاکستان میں خود کش حملہ کرنے کے لیے تربیت شمالی وزیرستان کے مرکزی علاقے میرعلی کے نواح میں ہی دی جاتی ہے،’ شمالی وزیرستان کے شہر میر علی میں ساڑھے تین سو تا چار سو افراد کو خود کش حملہ کرنے کی تربیت دی جا رہی ہے‘۔

پاکستان کے کئی نیوز ٹیلی وژن چینلز پر نشر کیے گئے انٹرویو میں عمر نے مزید بتایا‘ مجھے دو ماہ تک تربیت دی گئی، اس دوران میں نے دیکھا کہ وہاں بہت سے دیگر لڑکے بھی تربیت حاصل کر رہے تھے‘۔ عمر نے بتایا،’ خدا نے مجھے نئی زندگی عطا کی ہےتاہم مجھے افسوس ہے کہ ہم نے معصوم لوگوں کو ہلاک کیا‘۔

عمر فدائی نے اپنے انٹر ویو میں کہا کہ اسے بتایا گیا تھا کہ اس نے افغانستان میں غیر مسلموں کو ہلاک کرنا ہے،’ لیکن وہ مجھے ڈیرہ غازی خان لے گئے۔ میں نے انہیں بتایا کہ وہاں کوئی کافر نہیں ہے تو انہوں نے مجھے کہا کہ یہ لوگ کافروں سے زیادہ بد تر ہیں‘۔

عمر نے بتایا کہ میر علی میں واقع ایک سکو ل کے باہر ہی اسے ایک شخص ملا ،جس نے اسے بتایا کے پڑھنے لکھنے کا کوئی فائدہ نہیں ہے، اس لیے جنگجو بن جاؤ،’ اس نے مجھے کہا کہ تم سیدھے جنت میں جاؤ گے۔‘ عمر فدائی نے اس شخص کی شناخت قاضی ظفر کے نام سے کی۔

عمر فدائی نے کہا کہ وہ خود کش حملوں سے پانچ روز قبل ہی ڈیرہ غازی خان پہنچ گئے تھے، جہاں انہوں نے ایک ہوٹل میں قیام کیا۔’ہمیں تین اپریل کو خود کش جیکٹیں ملیں، ایاز نامی شخص نے ہمیں بتایا کہ ہم نے دربار پر کہاں کہاں حملہ کرنا ہے‘۔ سخی سرور کے دربار پر چار اپریل کو ہونے والے حملے میں پچاس افراد ہلاک جبکہ متعدد زخمی ہو گئے تھے۔

عمر کے مطابق وہ رکشوں اور منی بسوں میں بیٹھ کر سخی سرور کے دربار پہنچے۔ عمرکے بقول اسے کہا گیا تھا کہ وہ پہلے حملے کے تیس منٹ بعد حملہ کرے تاکہ زیادہ سے زیادہ جانی نقصان ہو سکے۔ بتایا جاتا ہے کہ عمر نے جب حملہ کرنا چاہا تو اس کی خود کش جیکٹ نہ پھٹ سکی، اور اسے گرفتار کر لیا گیا۔

ممکنہ طور پر خود کش حملہ آور بننے والے افراد کو پیغام دیتے ہوئے عمرفدائی نے کہا،’ برائےمہربانی، خودکش حملے کرنے سے انکار کر دو۔ ایسے حملوں کی اسلام میں کوئی گنجائش نہیں ہے‘۔

ایک محتاط اندازے کے مطابق جولائی 2007ء میں اسلام آباد کی لال مسجد پر حکومتی عسکری کارروائی کے بعد سے شروع ہونے والے مختلف حملوں کے نتیجے میں پاکستان بھر میں کم ازکم 4200 افراد ہلاک ہو چکے ہیں۔

رپورٹ: عاطف بلوچ

ادارت: عابد حسین