دنیا کے معمر ترین آدمی کی رحلت

جاپان کے ایک سو تیرہ سالہ شخص ماسازو نوناکا کی جب رحلت ہوئی تو وہ شمالی جاپان میں واقع اپنے گھر پر آرام کر رہے تھے۔ اتوار بیس جنوری کی علی الصبح بزرگ جاپانی شہری کو موت نے اپنی گرفت میں لیا۔ اُن کا مکان شمالی جاپانی علاقے اشورو میں واقع ہے۔ اشورو کا قصبہ جاپانی جزیرہ ہوکائیڈو میں ہے۔

ماسازو نوناکا کی پوتی یوکا نوناکا نے نیوز ایجنسی ایسوسی ایٹڈ پریس کو بتایا کہ رحلت کے وقت اُن کے دادا کو کوئی بے چینی یا بیماری لاحق نہیں تھی اور وہ انتہائی سکون کے ساتھ اس دنیا سے رخصت ہوئے۔ اُن کے فوت ہونے کا احساس مرحوم کی بہن کو ہوا اور جب خاندانی ڈاکٹر کو بلایا گیا تو اُس نے ماسازو کے انتقال کی تصدیق کر دی۔

ماسازو نوناکا کو گینیس ورلڈ ریکارڈ بُک نے اپریل سن 2018 میں دنیا کا معمر ترین مرد قرار دیا تھا۔ اُس وقت اُن کی عمر ایک سو بارہ برس اور 259 ایام تھی۔ وہ پچیس جولائی سن 1905 میں پیدا ہوئے تھے۔ وہ ایک بڑے خاندان میں پرورش پاتے ہوئے جوان ہوئے۔ اُن کو سرائے کا خاندانی کاروبار ورثے میں ملا تھا۔ نوناکا خاندان کی سرائے تقریباً ایک سو چھ سال پرانی ہے اور اب اس کی نگرانی اُن کی پوتی یوکا نوناکا کے پاس ہے۔

معمر ترین مرد جاپانی شہری کو مقامی میٹھی اشیاء بہت مرغوب تھیں۔ وہ بہاریہ موسم میں گرم گیلے تولیے سے خود کو راحت فراہم کرنے کو پسند کرتے تھے۔ اس کے علاوہ وہ باقاعدگی کے ساتھ اپنی وہیل چیئر پر بیٹھ کر سرائے کے اندر باہر گھومتے پھرتے تھے۔ وہ معمول کے مطابق اون سے بنی ہوئی ٹوپی کو پہن کر رکھتے تھے۔ یہ ٹوپی ایک طرح سے اُن کی شناخت بن کر رہ گئی تھی۔

ماسازو نوناکا کی بیوی اور سات اولادیں ان کی زندگی ہی میں موت کی وادی میں اتر چکی ہیں۔

اشورو میں نوناکا خاندان گزشتہ چار نسلوں سے ’گرم چشمے کی سرائے کا کاروبار جاری رکھے ہوئے ہے۔

جاپان میں ایک سو برس سے زائد کے عمر افراد کی تعداد سن 2018 کے ختم ہونے پر انہتر ہزار سات سو پچاسی تھی۔ ان میں نوے فیصد خواتین ہیں۔ دنیا کی معمر ترین عورت یا انسان کین تاناکا ہیں۔ ایک سو سولہ برس کی یہ جاپانی خاتون دنیا بھر میں سب طویل عمر کی حامل ہیں اور فوکووکا میں مقیم ہیں۔