دہلی: شہریت ترمیمی قانون کے حامیوں اور مخالفین میں جھڑپیں

بھارتی دارالحکومت دہلی کے متعدد علاقوں میں شہریت ترمیمی ایکٹ کے حامیوں اور مخالفین کے درمیان دوسرے روز بھی پر جھڑپیں ہوئی ہیں جس میں ایک کانسٹیبل کے ہلاک ہونے اور ایک ڈی ایس پی سمیت متعدد افراد کے زخمی ہوئے ہیں۔

پیر 24 فروری کو شمال مغربی دہلی کے بھجن پورہ میں بھی شہریت ترمیمی قانون کے حامیوں اور اس کے خلاف مظاہرین کے درمیان پر تشدد جھڑپیں ہوئیں جبکہ  شمال مشرقی دہلی کے جعفرآباد علاقے میں تشدد کا جو سلسہ کل شروع ہوا تھا وہ پیر کو بھی جاری رہا۔

جعفرآباد اور موج پور میں پرتشدد مظاہروں کے دوران کئی گاڑیوں، دکانوں اور ایک پیٹرول پمپ کو نذر آتش کر دیا گيا۔ پولیس نے مشتعل ہجوم کو منتشر کرنے کے لیے آنسو گیس کا استعمال کیا۔ متعدد زخیموں کو ہسپتال میں داخل کیا گيا ہے۔ دونوں گروہوں نے ایک دوسرے پر پتھراؤ بھی کیا۔ حکام ان علاقوں میں میٹرو ریل سروس معطل کر دی ہے۔

دہلی کے وزیر اعلی اروند کیجریوال اور گورنر انیل بیجل نے لوگوں سے امن و امان برقرار رکھنے کی اپیل کی ہے۔ اس تشدد کا سلسلہ گزشتہ روز جعفرآباد علاقے سے شروع ہوا تھا جہاں خواتین کا ایک بڑا گروپ کئی ہفتوں سے شہریت ترمیمی ایکٹ کی مخالفت میں دھرنے پر بیٹھا ہے۔ بی جے پی کے ایک رہنما نے اس علاقے میں اتوار کو متنازعہ قانون کی حمایت میں مظاہرہ کیا اور یہی جھڑپوں کا باعث بنا۔

دہلی میں بی جے پی کے رہنما کپل مشرا نے مظاہرے کی قیادت کرتے ہوئے خبردار کیا تھا کہ اگر پولیس نے شہریت ترمیمی قانون کی مخالفت کرنے والوں کے دھرنے کو تین روز کے اندر ختم نہیں کیا تو اسے برداشت نہیں کیا جائےگا اورپھر پولیس کی بھی نہیں سنی جائے گی۔

رکن پارلیمان اسد الدین اویسی کا کہنا ہے کہ دہلی میں ہونے والے فسادات کی وجہ بی جے پی رہنما کے اشتعال انگیز بیانات ہیں۔ انھوں نے اپنی ایک ٹویٹ میں لکھا، "اب چونکہ پولیس کے ملوث ہونے کے واضح ثبوت ہیں، سابق ایم ایل اے کو فوری طور پرگرفتار کرنا چاہیے اور اس سے پہلے کہ تشدد بے قابو ہوجائے اس پر قابو پانے کی ضرورت ہے۔"

یہ واقعات ایک ایسے وقت پیش آرہے ہیں جب امریکی صدر ڈونلڈ ٹرمپ بھارت کے دورے پر ہیں۔ پچیس فروری منگل کو نئی دہلی میں صدارتی محل پر اُن کا روایتی خیر مقدم کیا جائے گا اور اس کے بعد دونوں ملکوں کے وفود کی سطح پر باہمی بات چیت ہوگی۔